रूसको पश्चिमी क्षेत्र र्याजानको शिलोभ्स्की जिल्लास्थित एक बारुद कारखानामा शुक्रबार बिहान विस्फोटसहित आगलागी हुँदा कम्तीमा चार जनाको मृत्यु भएको छ।

स्थानीय समय अनुसार बिहान करिब १०:३० बजे उत्पादन कार्यशालामा आगलागी भएको हो। रूसी सञ्चारमाध्यमहरूका अनुसार मृत्यु हुने संख्या पाँच वा बढी हुनसक्ने र करिब २० जना घाइते भएको प्रारम्भिक अनुमान छ।

अधिकारीहरूले मृतक र घाइतेको आधिकारिक विवरण संकलन भइरहेको र घटनाको कारणबारे छानबिन सुरु भएको बताएका छन्। 2021 मा पनि सोही परिसरमा विस्फोट हुँदा 17 जनाको ज्यान गएको थियो।