काठमाडौँको ठमेलस्थित ब्रह्माकुमारी राजयोग सेवा केन्द्रमा शनिबार आयोजित ‘श्रीकृष्णाष्टमी तथा चैतन्य झाँकी अनावरण एवम् प्रवचन’ कार्यक्रममा उपराष्ट्रपति रामसहाय प्रसाद यादवले सत्य, शान्ति, न्याय, प्रेम र समृद्धिको बाटोमा अघि बढ्न सम्पूर्ण नेपालीलाई आग्रह गर्नुभयो। उहाँका अनुसार श्रीकृष्णको जीवन केवल धार्मिक विश्वासको विषय मात्र नभई गहिरो आध्यात्मिक ज्ञानको स्रोतका रूपमा बुझिनु आवश्यक छ।

यादवले श्रीकृष्णका बाल्यकालदेखि युवावस्थासम्मका प्रसङ्गले नेतृत्व, सेवा, समता र निष्काम कर्मको मूल्य बोकेको उल्लेख गर्दै अर्जुनको सारथी बनेर प्रस्तुत गरेको सेवाभावलाई नेतृत्वको सर्वोच्च उदाहरणका रूपमा चित्रण गर्नुभयो। उहाँका शब्दमा, ‘‘नेतृत्व शक्ति मात्र होइन, सेवा पनि हो भन्ने पाठ श्रीकृष्णको जीवनले दिएको छ।’’

उपराष्ट्रपतिले श्रीकृष्णको बाँसुरीलाई प्रेम, सौन्दर्य र आध्यात्मिक आनन्दको प्रतीकका रूपमा व्याख्या गर्दै उहाँलाई सत्य, करुणा र दायित्वबोधका प्रतिबिम्बका रूपमा चित्रण गर्नुभयो। उहाँले श्रीकृष्णको कर्मयोग दर्शन समाजलाई उत्तरदायी, विवेकी र कर्मशील बनाउन सक्ने सूत्र भएको उल्लेख गर्दै यी मूल्यलाई आत्मसात गर्न सके सद्भाव, नैतिक पुनर्जागरण र सांस्कृतिक समृद्धि सम्भव हुने विचार व्यक्त गर्नुभयो।

यस अवसरमा यादवले ब्रह्माकुमारी संस्थाले स्थापना कालदेखि नै नेपाली समाजमा शान्ति, सद्भाव र आध्यात्मिक चेतना फैलाउन खेलेको भूमिकाको प्रशंसा गर्दै धन्यवादसमेत दिनुभयो। उहाँको भनाइमा, यस्ता धार्मिक–आध्यात्मिक शिक्षाले वर्तमान समाजलाई आन्तरिक शान्ति र साझा मूल्यतर्फ अघि बढ्न प्रेरणा दिन सक्छन्।