भारतका विदेश सचिव विक्रम मिश्री आइतबारदेखि दुई दिने औपचारिक भ्रमणका लागि नेपाल आउन लाग्नुभएको छ। परराष्ट्र सचिव अमृतबहादुर राईको निमन्त्रणामा हुन लागेको यस भ्रमणलाई दुवै देशबीचको उच्चस्तरीय संवादलाई निरन्तरता दिने प्रयासका रूपमा हेरिएको छ।

परराष्ट्र मन्त्रालयका अनुसार भ्रमणका क्रममा नेपाल–भारत साझेदारीका विभिन्न पक्षमा व्यापक छलफल हुने कार्यक्रम छ। विशेषगरी यातायात र उर्जा पूर्वाधारमार्फत हुने ‘कनेक्टिभिटी’, विकास सहयोग र दुवै मुलुकको साझा चासोका मुद्दामा सचिवस्तरीय वार्ता हुने जनाइएको छ। नेपाल–भारत सम्बन्धमा यी विषयलाई दीर्घकालीन स्थायित्वका लागि आधार मानिने भएकाले यस बैठकले ठोस एजेन्डा अघि सार्ने अपेक्षा गरिएको छ।

नेपालमा रहँदा विदेश सचिव मिश्रीले उच्च सरकारी अधिकारीहरूसँग भेटवार्ता गर्ने कार्यक्रम रहेको छ। दुई दिने भ्रमण सकाएर उहाँ सोमबार काठमाडौँबाट प्रस्थान गर्ने बताइएको छ।

नेपाल र भारतबीच ऐतिहासिकरूपमा खुला सिमाना, सामाजिक–सांस्कृतिक सम्बन्ध र आर्थिक आवागमनलाई जोड्ने कडी रहँदै आएको छ। पछिल्ला वर्षहरूमा ऊर्जा व्यापार, रेलमार्ग, सडक सञ्जाल र विमान सेवा विस्तारजस्ता विषयमा दुवै मुलुकबीच छलफल भइरहेका छन्। तर कतिपय सीमा विवाद र राजनीतिक अविश्वासका कारण समय–समयमा सम्बन्धमा तनाब देखिँदै आएको छ।

यस पृष्ठभूमिमा विदेश सचिव स्तरको संवादले तत्कालीन समस्या समाधानका उपाय र भविष्यको सम्भावना दुवैलाई सम्बोधन गर्ने अपेक्षा गरिएको छ। नेपाल–भारत सम्बन्धलाई परम्परागत नाताभन्दा बढी पारस्परिक हित र व्यवहारिक सहकार्यमा आधारित बनाउन सकिने कि सकिँदैन भन्ने प्रश्नमा अबको छलफल निर्णायक बन्ने देखिन्छ।