प्रधानमन्त्री केपी शर्मा ओलीले नौबिसे–नागढुङ्गा सुरुङमार्गको निर्माण अन्तिम चरणमा पुगेको भन्दै यसले राजधानी प्रवेश गर्ने यात्रुको दीर्घकालीन समस्यालाई सहज बनाउने विश्वास व्यक्त गरेका छन्। आइतबार सामाजिक सञ्जालमार्फत ओलीले सुरुङमार्गको ९३ प्रतिशत काम सकिएको जनाउँदै यसलाई छिट्टै सञ्चालनमा ल्याइने बताएका हुन्। उनका अनुसार सुरुङमार्ग सञ्चालनमा आएपछि नागढुङ्गा क्षेत्रमा लामो समयदेखि भोगिँदै आएको ट्राफिक जाम र यात्रुको कष्ट अन्त्य हुनेछ।

सडक विभागका विवरणअनुसार, मन्त्रिपरिषद्ले गत साउन २६ गते नै सुरुङमार्ग प्रयोग गर्दा तिर्नुपर्ने दस्तुर स्वीकृत गरिसकेको छ। सो निर्णयअनुसार कार र भ्यानले काठमाडौं आउँदा ६५ रुपैयाँ र बाहिरिँदा ६० रुपैयाँ तिर्नुपर्नेछ। मिनी बस तथा साना ट्रकका लागि काठमाडौं आउँदा ११५ र जाँदा ८० रुपैयाँ निर्धारण गरिएको छ। ठूला बस तथा ट्रकले राजधानी प्रवेश गर्दा २६० र बाहिरिँदा २०० रुपैयाँ बुझाउनुपर्नेछ भने भारी उपकरण बोकेका सवारीसाधनले काठमाडौं आउँदा ६०० र फर्किँदा २५० रुपैयाँ तिर्नुपर्ने व्यवस्था गरिएको छ।

नागढुङ्गा सुरुङमार्गलाई काठमाडौं प्रवेशद्वारको महत्वपूर्ण वैकल्पिक मार्गका रूपमा हेर्ने गरिएको छ। लामो समयदेखि ढिलाइ हुँदै आएको यो आयोजनाको ९३ प्रतिशत काम सम्पन्न भइसकेको जानकारी प्रधानमन्त्रीले दिएका सन्देशसँगै यसको औपचारिक उद्घाटन नजिकिएको संकेत मिलेको छ। अबको केही महिनाभित्रै सञ्चालनमा आएमा देशकै पहिलो ठूलो सुरुङमार्गले राजधानीको यातायात व्यवस्थापनलाई नयाँ मोड दिने अपेक्षा बढेको छ।