भारतीय विदेशसचिव विक्रम मिस्रीले आइतबार काठमाडौँस्थित परराष्ट्र मन्त्रालयमा नेपालकी परराष्ट्रमन्त्री डा. आरजु राणा देउवासँग शिष्टाचार भेटवार्ता गरेका छन्। भेटमा नेपाल–भारत सम्बन्धका विविध आयामबारे छलफल भएको परराष्ट्र मन्त्रालयले जनाएको छ।

परराष्ट्रमन्त्री डा. राणाले भारतलाई नेपालको महत्वपूर्ण विकास साझेदारका रूपमा स्मरण गर्दै आर्थिक तथा प्राविधिक क्षेत्रमा दिएको सहयोगप्रति भारत सरकार र जनताप्रति आभार व्यक्त गरिन्। उनले पछिल्लो समय दुई देशबीच उच्चस्तरीय भ्रमण, कूटनीतिक संवाद र कनेक्टिभिटी विस्तार भएकोमा सन्तोष व्यक्त गर्दै यसले दुवै मुलुकलाई दीर्घकालीन लाभ पुग्ने विश्वास व्यक्त गरिन्।

भेटमा मन्त्री राणाले स्थलमार्ग र रेलमार्गसँगै हवाई कनेक्टिभिटी विस्तारलाई जोड दिँदै गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थलमा भारतीय सहरहरूबाट थप उडान सञ्चालन गर्न आवश्यक वातावरण बनाउन आग्रह गरिन्। उनले नेपालगन्ज–दिल्ली सिधा उडानका लागि पनि पहल गर्नुपर्नेमा जोड दिइन्।

भारतको सहयोगमा धनगढीको फाप्ला क्रिकेट स्टेडियम निर्माणमा तदारुकता देखाउनुपर्ने, नेपाल–भारत पारवहन सन्धि कार्यान्वयनमार्फत व्यापार सहजीकरण गर्नुपर्ने र नेपाली उद्योगपतिहरूले उठाएका निर्यातसम्बन्धी समस्या समाधानमा भारतले सहयोग गर्नुपर्ने विषय पनि राणाले उठाइन्। विशेषगरी स्टिल, प्लाईवुड जस्ता उत्पादनको निर्यातमा भारतीय बीआईएस मापदण्डका कारण देखिएका अवरोधबारे छलफल भएको मन्त्रालयको भनाइ छ।

साथै, पञ्चेश्वर बहुउद्देश्यीय परियोजना छिटो अघि बढाउनुपर्ने, यसले दुवै देशलाई ऊर्जासँगै बाढी तथा डुबान नियन्त्रणमा लाभ दिने भएकाले आपसी सहकार्य अपरिहार्य रहेको मन्त्री राणाले स्पष्ट गरिन्।

नेपाल–भारत सम्बन्धमा यस्ता नियमित संवादले राजनीतिक भन्दा पनि आर्थिक, प्राविधिक र सांस्कृतिक आयामलाई सबल बनाउन सहयोग गर्ने विश्वास कूटनीतिक वृतले व्यक्त गरेको छ।