भारतका विदेशसचिव विक्रम मिस्रीले आइतबार राष्ट्रपति रामचन्द्र पौडेलसँग शिष्टाचार भेट गरेका छन्। दुई दिने नेपाल भ्रमणका क्रममा बिहानै राष्ट्रपतिको कार्यालय पुगेर भएको भेटलाई नेपाल–भारत सम्बन्ध सुदृढ पार्ने अवसरको रूपमा हेरिएको छ।

राष्ट्रपति पौडेलका प्रेस सल्लाहकार किरण पोखरेलका अनुसार, भेटमा राष्ट्रपति पौडेलले भारतलाई एक उदाउँदो अन्तर्राष्ट्रिय शक्ति भन्दै त्यसको सामाजिक, आर्थिक र प्राविधिक प्रगतिबाट नेपाल प्रसन्न र उत्साहित भएको बताए। उहाँका अनुसार, “एक मित्र एवम् निकट छिमेकीका नाताले भारतका प्रगतिबाट नेपालले लाभ हासिल गरेको छ र अझ बढी लाभान्वित हुन चाहन्छौं।”

पौडेलले नेपाल–भारतबीच शताब्दीऔंदेखि सामाजिक, सांस्कृतिक, धार्मिक, आध्यात्मिक, आर्थिक तथा जनस्तरमै निकट सम्बन्ध रहँदै आएको स्मरण गराउँदै यी सम्बन्ध सार्वभौमिक समानता, आपसी सम्मान, विश्वास र सहयोगमा आधारित रहेको प्रष्ट पारे। उहाँले नेपालले भारतसँगको सम्बन्धलाई सधैँ उच्च प्राथमिकतामा राख्ने बताउँदै भारत सरकारको “छिमेक पहिलो नीति” प्रति सराहना व्यक्त गरे।

यस अवसरमा भारतीय विदेश सचिव मिस्रीले प्रधानमन्त्री नरेन्द्र मोदीले अघि सारेको छिमेकीसँगको सम्बन्धलाई प्राथमिकता दिने नीतिअनुसार नेपाल भारतको उच्च प्राथमिकतामा रहेको स्पष्ट पारे। उनले आधुनिक युगमा दुवै देशको प्रगति र विकासका लागि कनेक्टिभिटीका आयामलाई अझ विस्तार गर्ने विषयमा छलफल गर्न पाउने विश्वास व्यक्त गरे। साथै, आफ्नो भ्रमणले नेपाल–भारत सम्बन्धलाई थप गहिरो र प्रगाढ बनाउन योगदान पुर्‍याउने आशा पनि व्यक्त गरे।

नेपाल र भारतबीच भूराजनीति, व्यापार, सांस्कृतिक आदानप्रदान र सुरक्षा सहयोगका विविध पक्षहरू निरन्तर छलफलको केन्द्रमा रहँदै आएका छन्। यसपटकको भेटलाई पनि दुई छिमेकी मुलुकबीचको सम्बन्धलाई नयाँ उचाइमा पुर्‍याउने संकेतको रूपमा हेरिएको छ।