जर्मनी र चीनबीच एशिया–प्रशान्त क्षेत्रमा बढ्दो गतिविधिबारे आरोप–प्रत्यारोप चलेका छन्। जर्मन विदेशमन्त्री जोहान वाडेफुलले जापान भ्रमणका क्रममा चीनलाई “बढ्दो आक्रामक” भएको भन्दै बारम्बार एकतर्फी ढङ्गले यथास्थिति बदल्ने धम्की दिएको टिप्पणी गर्नुभयो। उहाँले चेतावनी दिँदै भन्नुभयो, “यस क्षेत्रमा उत्पन्न हुने कुनै पनि तनावले विश्व सुरक्षा र अर्थतन्त्रमा गम्भीर असर पार्छ।”

सोभन्दा अघिल्लो दिन जर्मन विदेश मन्त्रालयले विज्ञप्ति जारी गर्दै चीनलाई ‘क्षेत्रीय वर्चस्व जमाउन खोजेको’ तथा अन्तर्राष्ट्रिय कानुनमाथि प्रश्न उठाएको आरोप लगाएको थियो। जर्मनीको यस्तो धारणा चीनको भूमिकाबारे युरोपेली मुलुकहरूले बढाउँदै लगिरहेको आलोचनाको निरन्तरता हो।

जर्मन पक्षका यी वक्तव्यपछि चीनले सोमबार तीव्र प्रतिक्रिया जनाउँदै जर्मनीमाथि उल्टै ‘तनाव बढाउने र टकराव उक्साउने’ काम गरेको आरोप लगायो। चिनियाँ विदेश मन्त्रालयकी प्रवक्ता माओ निङले पूर्वी र दक्षिण चीन सागरको अवस्था सामान्यतया स्थिर रहेको बताउँदै, क्षेत्रीय मुलुकको सम्मान गर्दै वार्ता र परामर्शमार्फत समस्या समाधान गर्नुपर्नेमा जोड दिनुभयो। उहाँले थप भन्नुभयो, “तनाव बढाउनु शान्ति र स्थिरताका लागि लाभदायी छैन, ताइवानको प्रश्न चीनको आन्तरिक मामिला हो।”

यसअघि पनि चीनले विदेशी शक्तिलाई आफ्नो क्षेत्रीय मामिलामा हस्तक्षेप नगर्न चेतावनी दिँदै आएको छ भने युरोपेली मुलुकहरू विशेषतः जर्मनीले चीनको बढ्दो प्रभाव र आक्रामक रणनीतिप्रति चिन्ता व्यक्त गर्दै आएका छन्। एशिया–प्रशान्त क्षेत्र विश्व व्यापार र सुरक्षा सन्तुलन दुवैका लागि संवेदनशील मानिन्छ, जसले गर्दा यहाँ हुने शक्ति–प्रतिस्पर्धाले अन्तर्राष्ट्रिय राजनीतिको भविष्यलाई थप जटिल बनाइरहेको छ।