सन नेपाल लाइफ इन्स्योरेन्सले कर्मचारीहरूको क्षमता अभिवृद्धि र नियामक पालना सुनिश्चित गर्ने उद्देश्यले विशेष तालिम सम्पन्न गरेको छ। तालिममा ‘आर्थिक प्रणालीमा पारदर्शिता र सुरक्षा सुदृढीकरण’ मुख्य विषयवस्तुका रूपमा प्रस्तुत गरिएको कम्पनीले जनाएको छ।

नगरकोटस्थित रत्नागारि रिसोर्टमा आयोजना गरिएको उक्त कार्यक्रममा कम्पनीका कानूनी विभाग प्रमुख सुवास भण्डारीले प्रशिक्षण दिएका थिए। उहाँले बीमा क्षेत्रलाई पनि मनी लन्डरिङ र आतङ्कवादी वित्तीयकरणजस्ता विश्वव्यापी चुनौतीहरूले प्रभाव पार्न सक्ने भएकाले समयमै सचेत रहनुपर्ने आवश्यकता औंल्याउनुभयो। साथै अन्तर्राष्ट्रिय मापदण्ड, नेपाल सरकार र बीमा प्राधिकरणका निर्देशन, तथा दैनन्दिन कामकाजमा लागू हुने व्यावहारिक प्रक्रियाबारे विस्तृत प्रशिक्षण प्रदान गरिएको कम्पनीले जनाएको छ।

तालिममा कोशी, मधेश र बागमती प्रदेशका शाखा प्रमुखहरूसहित कम्पनीका प्रमुख बजार अधिकृत गणेश चौलागाई र अन्य पदाधिकारीहरूको उपस्थिति थियो। कम्पनीका अनुसार, यस्ता तालिमहरू कर्मचारीको दक्षता बढाउन र वित्तीय प्रणालीमा पारदर्शिता कायम गर्न महत्त्वपूर्ण मानिन्छन्।

हाल सन नेपाल लाइफ इन्स्योरेन्सले देशभरका १४३ शाखाबाट जीवन बीमा सेवा सञ्चालन गर्दै आएको छ। कम्पनीले प्रशिक्षणलाई आगामी दिनमा पनि निरन्तरता दिने प्रतिबद्धता जनाएको छ, जसले बीमा क्षेत्रको दिगोपन र विश्वासलाई थप बलियो बनाउन सहयोग गर्ने अपेक्षा गरिएको छ।