सङ्घीय मामिला तथा सामान्य प्रशासन मन्त्रालयले आगामी भदौ ६ गते उत्कृष्ट कार्यसम्पादन गर्ने स्थानीय तहलाई सम्मान गर्ने तयारी गरेको छ। मन्त्रालयका अनुसार आर्थिक वर्ष २०८०/८१ को स्थानीय तह संस्थागत क्षमता स्वमूल्याङ्कन (लिसा) अन्तर्गत उत्कृष्ट नतिजा प्राप्त गरेका छ वटा स्थानीय तहलाई राष्ट्रिय स्तरमा पुरस्कृत गर्न लागिएको हो।

मन्त्रालयले लिसा प्रणालीलाई स्थानीय सरकारको कार्यप्रक्रिया, उपलब्धि र कमजोरीको समग्र मूल्याङ्कन गर्ने आधारका रूपमा लिएको छ। यसले शासन प्रक्रियामा सुधार गर्नुपर्ने पक्ष पहिचान गर्न, आवधिक समीक्षाका लागि विश्वसनीय तथ्याङ्क उपलब्ध गराउन र स्थानीय तहबीच स्वस्थ प्रतिस्पर्धाको भावना जागृत गर्न योगदान गर्ने बताइएको छ। मन्त्रालयद्वारा गुणस्तर परीक्षण सम्पन्न भइसकेपछि अन्तिम नतिजा सार्वजनिक गरिएको हो।

यस आधारमा सम्मानका लागि चयन भएका स्थानीय तहहरूमा चितवनको खैरहनी नगरपालिका, रुपन्देहीको तिलोत्तमा नगरपालिका, धादिङको नीलकण्ठ नगरपालिका र बेनीघाट रोराङ गाउँपालिका, स्याङजाको अर्जुनचौपारी गाउँपालिका र गुल्मीको रुरुक्षेत्र गाउँपालिका रहेका छन्। यी स्थानीय तहहरूले राष्ट्रिय स्तरमा उच्चतम अंक प्राप्त गरेको मन्त्रालयले पुष्टि गरेको छ।

मन्त्रालयले भदौ ६ गते आयोजित विशेष कार्यक्रममा मन्त्री भगवती न्यौपानेको उपस्थितिमा उत्कृष्ट स्थानीय तहलाई सम्मान गर्ने र सो अवसरमा ‘स्थानीय शासन कार्यसम्पादन मूल्याङ्कन प्रणाली’ पनि औपचारिक रूपमा सुरु गर्ने तयारी गरेको छ। यसले आगामी वर्षहरूमा स्थानीय शासनको गुणस्तर र उत्तरदायित्वबोध अझ स्पष्ट बनाउने अपेक्षा गरिएको छ।