सामसङ इनोभेसन क्याम्पसअन्तर्गत कोडिङ र प्रोग्रामिङ कोर्सको तेस्रो ब्याच पूरा गरेका त्रिभुवन विश्वविद्यालय अन्तर्गत पूर्वीय इन्जिनियरिङ क्याम्पसका ५६ विद्यार्थीलाई प्रमाणपत्र वितरण गरिएको छ। बुधबार काठमाडौंमा आयोजित कार्यक्रममा विश्वविद्यालयका कुलपति प्रा. डा. दीपक आर्यल, क्याम्पस प्रमुख डा. सञ्जय उप्रेती र इन्जिनियरिङ अध्ययन संस्थाका डीन प्रा. डा. सुशील बी. बज्राचार्य उपस्थित थिए।

सामसङले आफ्नो प्रमुख सामाजिक उत्तरदायित्व (CSR) कार्यक्रम अन्तर्गत सञ्चालित यस प्रशिक्षणमार्फत युवाहरूलाई AI, IoT, Big Data तथा कोडिङ र प्रोग्रामिङका क्षेत्रमा दक्ष बनाउने उद्देश्य लिएको छ। कम्पनीका अनुसार विद्यार्थीहरूले सीप सिक्नासँगै सामाजिक महत्वका परियोजनामा पनि काम गर्ने अवसर पाएका छन्, जसले वास्तविक चुनौतीहरूको समाधानमा योगदान पुर्‍याउने अपेक्षा गरिएको छ।

सामसङ नेपालका मानवश्रोत प्रबन्धक जयन्त मणि कायस्थले कार्यक्रममा भनिए, “कोडिङ र प्रोग्रामिङको तेस्रो ब्याच सफलतापूर्वक पूरा भएकोमा हामी खुसी छौं। त्रिभुवन विश्वविद्यालयसँगको सहकार्यमा हामी AI, Big Data र IoT तालिमलाई अझ सुदृढ बनाउने र विद्यार्थीलाई भविष्यको रोजगारीका लागि सक्षम बनाउने लक्ष्य राखेका छौं।”

कार्यक्रमसँगै नयाँ ब्याचको AI र Big Data तालिम सुरु हुने घोषणा पनि गरिएको छ। इन्जिनियरिङ अध्ययन संस्थाका डीन बज्राचार्यले यसलाई “नेपालका विद्यार्थीलाई भविष्यको प्रविधि सिकाइमा जोड दिने महत्त्वपूर्ण अवसर” भन्दै विश्वविद्यालय र सामसङबीचको सहकार्यलाई गर्वको विषय भएको बताए।

सन् २०२२ डिसेम्बरमा सुरु गरिएको सामसङ इनोभेसन क्याम्पसले अहिलेसम्मका तालिममार्फत प्राविधिक सीपसँगै समस्या समाधान, सृजनात्मकता र रोजगारीयोग्यता जस्ता Soft Skills मा पनि जोड दिएको छ। विद्यार्थीहरूको छनोट प्रोग्रामिङ, डाटा स्ट्रक्चर र एल्गोरिदममा उनीहरूको आधारभूत ज्ञानका आधारमा हुने जनाएको छ।

सामसङले विश्वव्यापी रूपमा आफ्ना CSR कार्यक्रममार्फत प्रविधि र नवीनतालाई जोड दिने काम गर्दै आएको छ। नेपालमा सञ्चालन भइरहेको यो पहललाई प्राविधिक सीप अभिवृद्धि र भविष्यको श्रम बजार तयारीका दृष्टिले शिक्षा क्षेत्रका सरोकारवालाले महत्त्वपूर्ण कदमका रूपमा लिएका छन्।