दक्षिण कोरियाका राष्ट्रपति ली जे म्युङले उत्तर कोरियाको आणविक निःशस्त्रीकरणका लागि चरणबद्ध योजना अघि सारेका छन्। टोकियोमा जापानी प्रधानमन्त्री शिगेरु इशिबासँगको शिखर वार्ताअघि एक अखबारलाई दिनुभएको अन्तर्वार्तामा उहाँले तीनवटा लक्ष्य प्रस्तुत गर्नुभयो-पहिलो, उत्तर कोरियाको आणविक र क्षेप्यास्त्र कार्यक्रम स्थगित गराउने; दोस्रो, उक्त कार्यक्रमलाई क्रमशः घटाउने; र अन्तिम चरणमा पूर्णरूपमा ध्वस्त पार्ने।

राष्ट्रपति लीले यो प्रक्रिया संवादमार्फत अघि बढाउनुपर्ने र त्यसका लागि सियोलले वासिङ्टनसँग घनिष्ठ सहकार्य गर्ने स्पष्ट पारे। उहाँका अनुसार, अमेरिकासँगको गठबन्धन र विश्वासको आधारमा मात्र प्योङयाङसँग सार्थक संवाद सुरु गर्न सकिन्छ। साथै, अन्तर-कोरियाली वार्ता पुनः सुरु गर्न उपयुक्त अवस्था सिर्जना गर्न दक्षिण कोरियाले वातावरण तयार पार्ने प्रयास गर्ने उहाँको भनाइ छ।

उत्तर कोरियाको आणविक कार्यक्रम दशकौँदेखि कोरियाली उपद्वीपमा अस्थिरताको प्रमुख कारक रहँदै आएको छ। अघिल्ला वर्षमा भएका वार्ता र सम्झौताहरू प्रायः असफल हुँदा द्वन्द्व समाधानका प्रयास बारम्बार अड्किँदै आएका छन्। यसपटक दक्षिण कोरियाली नेतृत्वले चरणबद्ध रणनीति सार्वजनिक गर्नु क्षेत्रीय सुरक्षाका दृष्टिले नयाँ पहलका रूपमा हेरिएको छ।

लीको भनाइले सियोलको कूटनीतिक प्राथमिकता स्पष्ट गरेको छ-कठोर नियन्त्रणभन्दा बढी संवाद र विश्वास निर्माणमार्फत दीर्घकालीन समाधान खोज्ने। तर, यसलाई व्यवहारमा उतार्न प्योङयाङको प्रतिक्रिया निर्णायक हुने देखिन्छ।