हेटौँडा–काठमाडौँ जोड्ने कान्तिराजपथ शनिबार बिहान ११:१५ बजेदेखि फेरि चलायमान भएको छ। भीमफेदी–८, भर्याङडाँडामा शुक्रबार साँझ करिब ५ बजे खसेको पहिरोका कारण बन्द भएको यो खण्ड इलाका प्रहरी कार्यालय ठिंगनको पहल र सडक विभागको समन्वयमा बिहानैदेखि डोजर परिचालन गरी हटाइएपछि करिब १८ घण्टा्मा खुला भएको हो। आवागमन सुरु भएसँगै यात्रुहरूले लामो प्रतीक्षापछि सहज महसुस गरेको स्थानीय प्रशासनले जनाएको छ।

यससँगै, भिमफेदी गाउँपालिका–१, बागझुरा नजिकै ५०० मिटर पश्चिमतर्फ त्रिभुवन राजपथमा शुक्रबार राति करिब १०:१० बजे खसेको अर्को पहिरो पन्छाएपछि भदौ ७ गते दिउँसो १२ बजेदेखि एकतर्फी सञ्चालनमा आएको जिल्ला प्रहरी कार्यालय मकवानपुरले जानकारी दिएको छ। पहिरोका कारण रातभर सडक अवरुद्ध हुँदा सवारीसाधन रोकिनुपरेको र सुरक्षाकर्मी तथा स्थानीयवासीको सहयोगमा बाटो खुलाइएकेेो प्रहरीले बताएको छ।

अविरल वर्षापछि हेटौँडा–काठमाडौँ जाने अन्य छोटा दूरीका मार्गहरू—सिस्नेरी र फाखेल सडकखण्ड—समेत अवरुद्ध हुँदा यात्रुहरू घण्टौँ अलपत्र परेको अवस्था बनेको थियो। ती वैकल्पिक मार्ग क्रमशः खोल्ने कार्य जारी रहेको सडक विभागले जनाएको छ।

उता हेटौँडाको कमलमत्ता क्षेत्रमा खसेको ठूलो पहिरो अझै पूर्णरूपमा पन्छाउन बाँकी छ। त्यहाँ माटो र ढुङ्गाको थुप्रो धेरै भएकाले बाटो पूर्ण रूपमा खुलाउन केही समय लाग्ने अनुमान सम्बन्धित निकायहरूले गरेको हुँदा, स्थायी मर्मतपछि मात्रै सहज आवागमन सुनिश्चित हुने अपेक्षा राखिएको छ।