अमेरिकी राष्ट्रपति डोनाल्ड ट्रम्पले चीनसँगको भन्सार विवादबीच मङ्गलबार चिनियाँ विद्यार्थीलाई प्रवेश दिने निर्णयलाई स्पष्ट गरेका छन्। वाशिङ्टनमा पत्रकारलाई सम्बोधन गर्दै ट्रम्पले चीनबाट “छ लाख विद्यार्थीलाई अमेरिका भित्र्याइने” उल्लेख गर्दै यो दुई देशबीचको सम्बन्धका लागि महत्त्वपूर्ण कदम भएको बताए। अफवाहका रूपमा फैलिएको “विद्यार्थीलाई अनुमति दिइँदैन” भन्ने कुरालाई अस्वीकार गर्दै उनले भने, “हामी उनीहरूलाई भित्र आउन दिनेछौँ, यो ठूलो कुरा हो।”

फक्स न्युजका अनुसार हाल अमेरिकी विश्वविद्यालयहरूमा करिब दुई लाख ७० हजार चिनियाँ विद्यार्थी अध्ययनरत छन्। ट्रम्पको भनाइमा विद्यार्थी आदानप्रदान मात्र होइन, आर्थिक सम्बन्ध पनि अघिल्लो बाइडेन प्रशासनको तुलनामा मजबुत भएको छ। उनले चिनियाँ राष्ट्रपति सी जिनपिङसँगको सम्बन्धलाई “महत्त्वपूर्ण” भन्दै आफूलाई चीन भ्रमणका लागि आमन्त्रण गरिएको उल्लेख गरे।

तर व्यापारिक मोर्चामा तनाव अझै कायमै छ। यस वर्ष सुरुमा अमेरिकाले सबै चिनियाँ सामानमा १४५ प्रतिशतसम्म कर लगाएको थियो, जसको जवाफी कदमस्वरूप चीनले अमेरिकी निर्यातमा १२५ प्रतिशत कर लगाएको थियो। जेनेभामा गत मे महिनामा दुबै देशका वार्ताकारले अतिरिक्त कर रोक्ने सहमति गरे पनि ट्रम्पले बारम्बार नयाँ दण्डात्मक करको चेतावनी दिँदै आएका छन्। गत हप्तामात्रै उनले चीन निर्मित म्याग्नेटमा २०० प्रतिशत कर घोषणा गरेका थिए। उनले यो उत्पादनलाई बेइजिङले “विश्व बजारमा एकाधिकार गरेको” भन्दै अमेरिकाले वैकल्पिक आपूर्ति खोज्न कम्तीमा एक वर्ष लाग्न सक्ने चेतावनी दिए।

यसैबीच, अमेरिकी विदेशमन्त्री मार्को रुबियोले मे महिनामा चिनियाँ नागरिक, विशेषतः कम्युनिस्ट पार्टी वा संवेदनशील अनुसन्धानमा संलग्न व्यक्तिलाई लक्षित गरी भिसा रद्द गर्ने योजना सार्वजनिक गरेका थिए। तर ट्रम्पले जुन महिनामा पुनः दोहोर्याउँदै चीनका विद्यार्थीलाई सदैव स्वागत गर्ने पक्षमा आफू रहेको स्पष्ट पारे।

चीनसँग व्यापार र शिक्षा दुवै क्षेत्रमा बढ्दो तानातानबीच ट्रम्पको यो घोषणा वाशिङ्टनले सम्बन्धलाई कस्तो दिशातर्फ लैजान चाहन्छ भन्नेबारे अझै स्पष्ट सन्देश दिन्छ। विद्यार्थी प्रवेश खुलेको सन्देशले शैक्षिक क्षेत्रलाई सहजता दिन सक्छ, तर कर विवाद समाधान नहुन्जेल दुई महाशक्तिबीचको आर्थिक सम्बन्ध अस्थिर रहनसक्ने देखिन्छ।