अस्ट्रेलियामा उपभोग्य वस्तु तथा सेवाको मूल्यवृद्धि दर सन् २०२५ को जुलाई महिनामा २.८ प्रतिशत पुगेको छ, जुन पछिल्लो एक वर्षकै सबैभन्दा उच्च दर हो । अस्ट्रेलियाली तथ्याङ्क विभागका अनुसार, अघिल्लो महिनामा यो दर १.९ प्रतिशतमा सीमित थियो । यो वृद्धिले सन् २०२४ को जुलाईपछि कै नयाँ शिखर छुन पुगेको हो, त्यसबेला वार्षिक मुद्रास्फीति ३.५ प्रतिशतमा पुगेको थियो ।

अर्थशास्त्रीहरूले करिब २.३ प्रतिशत वृद्धि हुने अनुमान गरेका थिए, तर वास्तविक आँकडा त्यसभन्दा माथि गयो । मूल्यवृद्धिको आधारभूत मापन (ट्रिम गरिएको औसत दर) पनि अघिल्लो महिनाको २.१ बाट बढेर २.७ प्रतिशतमा पुगेको तथ्याङ्कले देखाउँछ ।

सांख्यिकीय विवरणअनुसार, आवास तथा घरभाडा खर्चमा ३.६ प्रतिशत, खाद्यान्न र गैर–मद्यपेय वस्तुहरूमा ३ प्रतिशत र मद्यपान तथा सुर्तीजन्य वस्तुमा ६.५ प्रतिशत वृद्धिले समग्र मूल्यवृद्धिमा प्रमुख योगदान गरेको छ । यिनैमध्ये विशेषत: कफी, चिया र कोकोको मूल्य १४.४ प्रतिशतसम्म बढेको छ । विभागका अधिकारीहरूको भनाइमा अन्तर्राष्ट्रिय स्तरमा प्रतिकूल मौसमका कारण उत्पादनमा आएको कमीले यी वस्तुको आपूर्ति प्रभावित भएको हो ।

यसैबीच, अस्ट्रेलियाको केन्द्रीय बैँकले हालै सार्वजनिक गरेको पूर्वानुमानमा सन् २०२५ को बाँकी अवधिमा मूल्यवृद्धि अझै चुलिन सक्ने देखाएको छ । बैँकको आकलनअनुसार सन् २०२६ को अधिकांश समयसम्म मुद्रास्फीति करिब ३ प्रतिशत वरिपरि स्थिर रहने सम्भावना छ ।

अहिले देखिएको दरले उपभोक्ता मात्र नभई नीतिनिर्मातामा पनि दबाब बढाएको छ । आगामी महिनाहरूमा केन्द्रीय बैँकको मौद्रिक नीतिमा हुने निर्णयले अस्ट्रेलियाको आर्थिक दिशानिर्देशन स्पष्ट पार्ने अपेक्षा गरिएको छ ।