अस्ट्रेलियाले इरानमाथि लगाएको आरोपलाई तेहरानले कडा रूपमा खारेज गरेको छ। इरानी विदेश मन्त्रालयका प्रवक्ता इस्माइल बाघाईले मङ्गलबार पत्रकार सम्मेलनमा बोल्दै सिड्नीको कोशेर क्याफेमा गत अक्टोबरमा भएको आगलागी र गत डिसेम्बरमा मेलबर्नको सिनागगमा भएको आगलागीमा इरानको संलग्नता रहेको अष्ट्रेलियाली दाबीलाई ‘निराधार’ बताउँदै अस्वीकार गर्नुभयो।

बाघाईले प्रधानमन्त्री एन्थोनी अल्बानिजले तेहरानमाथि सार्वजनिक रूपमा आरोप लगाउनु स्वयं अस्वीकार्य रहेको बताउँदै कूटनीतिक सन्दर्भमा यस्ता कदमले द्विपक्षीय सम्बन्धमा नकारात्मक प्रभाव पार्ने चेतावनी दिनुभयो। उहाँका अनुसार, “अन्यायपूर्ण कदमहरूको प्राकृतिक रूपमा प्रतिकृया हुनेछ, र यसबारे इरानले औपचारिक प्रतिक्रिया दिन तयारी गरिरहेको छ।”

इरानले अस्ट्रेलियाद्वारा हालै गरिएका कदम-जसअन्तर्गत तेहरानस्थित इरानी राजदूत अहमद सादेगीलाई निष्कासन गर्ने निर्णय र आफ्नो दूतावासको सञ्चालन स्थगित गर्ने घोषणा-लाई दुई देशबीचको सम्बन्धविरुद्धको कारबाहीका रूपमा चित्रण गरेको छ। बाघाईले यसलाई अस्ट्रेलियाभित्र बढिरहेका इस्रायलविरोधी प्रदर्शन र केही राजनीतिज्ञहरूले गरेका दुर्लभ आलोचनाको दबाबलाई सन्तुलन गर्ने प्रयास मात्र भएको दाबी गर्नुभयो।

प्रधानमन्त्री अल्बानिजले मंगलबार अस्ट्रेलियाले इरानबाट आफ्ना राजदूत फिर्ता बोलाउने र तेहरानस्थित दूतावासलाई अस्थायी रूपमा बन्द गर्ने घोषणा गर्नुभएको थियो। यो कदम दुई देशबीच बढ्दो तनावको स्पष्ट संकेतका रूपमा हेरिएको छ।

हालै अस्ट्रेलियामा हजारौँ मानिसले कब्जा गरिएका प्यालेस्टिनी भूभागमा भइरहेको हिंसा र इजरायली कारबाहीविरुद्ध प्रदर्शन गरेका थिए। यसबीचमा सरकारको इजरायलप्रतिको नीतिबारे आलोचना सार्वजनिक रूपमा उठ्न थालेको छ, जसलाई इरानले आफ्नो पक्षमा देख्ने प्रयास गरेको छ।

कूटनीतिक सम्बन्ध चिसिँदै गएको यो अवस्थामा, अस्ट्रेलिया–इरानबीच आगामी दिनमा हुने सम्भावित प्रतिक्रियाले दुवै मुलुकका विदेशनीति प्राथमिकता र अन्तर्राष्ट्रिय साझेदारीहरूमा थप जटिलता ल्याउने देखिएको छ।