बाँके जिल्लामा भारतसँग जोडिएका नाका हुँदै तीव्र रूपमा बढिरहेको लागुऔषध कारोबारलाई नियन्त्रण गर्न प्रहरीले हाल विशेष ‘अपरेसन’ सञ्चालन गरिरहेको छ। जिल्ला प्रहरी कार्यालय बाँके र लागुऔषध नियन्त्रण ब्युरोको संयुक्त प्रयासमा सञ्चालन भएको कारबाहीले पछिल्ला दिनमा लगातार ठूला परिणाम देखाएको प्रहरीले जनाएको छ।

जिल्ला प्रहरी प्रमुख प्रहरी उपरीक्षक (एसपी) रामप्रसाद घर्तीमगरका अनुसार खुला सिमानाका कारण भारततर्फबाट ब्राउन सुगरजस्ता लागुऔषधको ओसारपसार बढेपछि संयुक्त अपरेसन गर्नुपर्ने आवश्यकता देखिएको हो। उहाँले पछिल्लो समय ठूलो मात्रामा लागुऔषधसहित तस्करहरू पक्राउ परिरहेको जानकारी दिनुभयो।

अपरेसनको क्रममा एक साताभित्रै ४२५.५ ग्राम ब्राउन सुगर बरामद हुनुका साथै आठ जना पक्राउ परेका छन्। नेपालगन्ज–१६, जयसपुरबाट २१ वर्षीय रियाज खानलाई एक सय ग्राम ब्राउन सुगर र युपी नम्बरको मोटरसाइकलसहित पक्राउ गरिएको छ। यसअघि अस्थायी प्रहरी पोस्ट नगर भवनका सहायक प्रहरी निरीक्षक सुनील शाही नेतृत्वको टोलीले १४९ ग्राम ब्राउन सुगर नियन्त्रणमा लिएको थियो।

त्यस्तै, नेपालगन्ज–११, त्रिभुवन चोकमा ४४ वर्षीय रसुल अहमद कबडिया १०१ ग्रामसहित र मुसाफिर खाना नजिक दाङ तुलसीपुर–५ का २७ वर्षीय विराज विक ४८ ग्रामसहित पक्राउ परेका थिए। दुवैलाई पेसागत कारोबारी रहेको प्रहरीको दाबी छ।

गत सातामै बसपार्क पछाडिबाट १६१ ग्राम ब्राउन सुगरसहित चार जनालाई नियन्त्रणमा लिँदा लागुऔषध ब्युरोका सहायक प्रहरी निरीक्षक नवीन शाहीमाथि आक्रमण समेत भएको थियो। सो क्रममा गोली चल्दा दुई भारतीयसहित चार जना पक्राउ परेका थिए। त्यस्तै, उधौपुरवाका २८ वर्षीय रमेश लोनियाको घरमा छापा मार्दा २२ लाख रुपैयाँ नगद र १५.५ ग्राम ब्राउन सुगर बरामद भएको थियो। उनलाई प्रहरीले ठुलो कारोबारीको रूपमा पहिचान गरेको छ।

जिल्ला प्रहरी कार्यालय बाँकेका प्रवक्ता प्रहरी नायब उपरीक्षक दीपक पातलीले अपरेसन प्रयोगकर्ता, ओसारपसारकर्ता र विक्रेतासम्म लक्षित भएको बताए। “तस्करीको जालो तोड्न धेरै हदसम्म सफल भएका छौँ,” उहाँले भन्नुभयो, “निगरानी अझ कडा पारिएको छ।”

स्थानीयवासीले भने खुला सिमानाका कारण समस्या पुनः दोहोरिने आशंका व्यक्त गर्दै दीर्घकालीन समाधानका लागि दुवै देशबीच समन्वय र कठोर कानुनी कदम अनिवार्य रहेको बताएका छन्। प्रहरीको तत्कालीन अपरेसनले आशा जगाएको भए पनि यसको दिगो प्रभाव नाप्न अझै केही समय लाग्ने देखिन्छ।