कोशी प्रदेशका मुख्यमन्त्री हिक्मतकुमार कार्की र नेपालका लागि इजरायली राजदूत स्मुलिक ऐरी बासबीच विराटनगरस्थित मुख्यमन्त्री तथा मन्त्रिपरिषद्को कार्यालयमा भएको भेटमा दुई देशबीचको सहकार्य अझ प्रगाढ बनाउनुपर्ने विषयमा छलफल भएको छ।

सो अवसरमा मुख्यमन्त्री कार्कीले नेपाल–इजरायल सम्बन्धको ऐतिहासिक पृष्ठभूमि स्मरण गर्दै कृषि, श्रम, रोजगार र स्वास्थ्य क्षेत्र दुई देशबीचको मुख्य सहकार्यका आधार रहेको बताए। उहाँका अनुसार, हाल नेपाली युवा विशेषगरी कृषि तथा केयरगिभर क्षेत्रमा इजरायलमा कार्यरत छन्, तर यसलाई अझ व्यवस्थित बनाउन आवश्यक छ। नवप्रवर्तन र प्रविधि हस्तान्तरणमा इजरायलको अनुभव नेपालका लागि उपयोगी हुने भन्दै उहाँले कोशी प्रदेश पनि सहकार्यमा तयार रहेको स्पष्ट पार्नुभयो।

मुख्यमन्त्री कार्कीले कोशी प्रदेशमा कृषि उत्पादनको ठूलो सम्भावना रहेको उल्लेख गर्दै सरकारले युवालाई कृषि उद्यमशीलतामा आकर्षित गर्न ब्याज अनुदान उपलब्ध गराएको जानकारी दिए। उहाँले कृषकलाई शैक्षिक र व्यावहारिक तालिम दिने व्यवस्था हुन सके प्रदेशको आर्थिक समृद्धिमा ठूलो योगदान पुग्ने विश्वास व्यक्त गरे। साथै, हाल इजरायलमा पक्राउ परेका नेपाली युवा विपिन जोशीको रिहाइका लागि पहल गर्न समेत आग्रह गरे। मनमोहन प्राविधिक विश्वविद्यालय र गौरादह कृषि क्याम्पससँग सहकार्य गरी व्यावहारिक कार्यक्रम अघि बढाउन उहाँले राजदूतलाई आह्वान गरे।

इजरायली राजदूत स्मुलिक ऐरी बासले भने नेपाल–इजरायल मित्रता पहिलो निर्वाचित प्रधानमन्त्री बीपी कोइरालाको पालादेखि नै सुमधुर रहेको उल्लेख गर्दै यो सम्बन्ध अझ गहिरिनुपर्ने बताए। उनले इजरायलमा केयरगिभर र कृषि क्षेत्रमा नेपाली युवाका लागि अवसर खुला रहेको भन्दै नेपालले यसतर्फ प्राथमिकता दिनुपर्नेमा जोड दिए। कृषि क्षेत्रमा इजरायलले कम जनशक्ति प्रयोग गरेर उल्लेखनीय उपलब्धि हासिल गरेको उदाहरण प्रस्तुत गर्दै उनले नेपालमा कृषि कार्यमा संलग्न जनसंख्या बढी भए पनि अपेक्षित प्रगति नभएको टिप्पणी गरे। त्यसैले, कृषि प्रविधि र उद्यमशीलता विकासका क्षेत्रमा दुई देशबीच सहकार्यको सम्भावना अझ बढाउन सकिने उनको धारणा थियो।

विराटनगरमा भएको यो भेटघाटले नेपाल र इजरायलबीच श्रम, कृषि र प्रविधि क्षेत्रमा नयाँ अध्याय सुरु गर्ने अपेक्षा गरिएको छ, जसले स्थानीय युवालाई अवसर दिलाउनका साथै प्रदेशको समग्र आर्थिक रुपान्तरणमा सहयोग पुर्याउने आशा गरिएको छ।