युरोपेली संघका प्रमुख एन्टोनियो कोस्टाले रूसद्वारा किएभमा गरिएका पछिल्ला आक्रमणप्रति गहिरो आघात व्यक्त गर्दै आफू “भयभीत” भएको टिप्पणी गर्नुभएको छ । सामाजिक सञ्जाल एक्समार्फत वक्तव्य जारी गर्दै उहाँले आक्रमणमा पीडित युक्रेनीहरू र इयू नियोगका कर्मचारीहरूसँग ऐक्यबद्धता प्रकट गर्न तयार रहेको स्पष्ट पार्नुभयो । कोस्टाले लेख्नुभयो, “इयू डराउने छैन । रूसको आक्रामकताले युक्रेन र त्यहाँका जनताको पक्षमा उभिने हाम्रो सङ्कल्पलाई अझै बलियो बनाएको छ ।” उहाँले साझा गरेका तस्वीरमा फुटेका झ्याल, क्षतिग्रस्त छत र भुइँभरि छरिएका भवनका टुक्राहरू स्पष्ट देखिन्छन् ।

युक्रेनका लागि इयूका राजदूत क्याटरिना माथेरनोभाले विस्फोटको शक्तिशाली झट्काले नियोगको भवनलाई गम्भीर क्षति पु¥याएको बताउनुभयो । तर इयूका एक अधिकारीले एएफपीसँग जानकारी दिँदै कुनै पनि कर्मचारी घाइते नभएको पुष्टि गरेका छन् । युक्रेनी अधिकारीका अनुसार, रातभर भएका बमबारीका कारण एक बालकसहित कम्तीमा १० जनाको मृत्यु भएको छ ।

युरोपेली संघका उच्च कूटनीतिज्ञ काजा कल्लासले पनि आक्रमणलाई निन्दा गर्दै एक्समा लेख्नुभयो, “विश्वले शान्तिको बाटो खोजिरहेको बेला रूसले क्षेप्यास्त्र प्रहार गरेको छ ।” उहाँका अनुसार, रातिको समयमा भएको हमला शान्ति प्रयासलाई बेवास्ता गर्ने र खिल्ली उडाउनुपर्ने रूसको सुनियोजित निर्णयको प्रमाण हो ।

किएभमा भइरहेका निरन्तर आक्रमणहरूले युक्रेनका सर्वसाधारणलाई भय र असुरक्षाबीच जीवन बिताउन बाध्य बनाइरहेका छन्, भने इयूका शीर्ष नेताहरूले यसलाई युद्ध अन्त्यका सम्भावित वार्ताका बाटोबाट टाढा पुर्‍याउने संकेतका रूपमा व्याख्या गरेका छन् । बढ्दो आक्रामकता बीच कूटनीतिक समर्थन र मानवीय सहयोग कति प्रभावकारी बन्ने हो भन्ने प्रश्न अझ गहिरिँदै गएको छ ।