सिरहाको लहान नगरपालिका–१९ कटाहा चोक नजिकै सशस्त्र प्रहरीले भन्सार छलि गरेर ल्याइँदै गरेको लत्ताकपडासहित भारतीय स्कारपियो गाडी नियन्त्रणमा लिएको छ। भाद्र १२ गते गरिएको सो कारबाहीमा झण्डै ७ लाख रुपैयाँ मूल्यका कपडा बरामद भएको र गाडीको मूल्यसमेत जोड्दा बरामद सामानको मूल्य करिब १५ लाख रुपैयाँ पुगेको सशस्त्र प्रहरी बल नेपालले जनाएको छ।

बिआर ०१ पिबि ४६४२ नम्बरको भारतीय स्कारपियोलाई नियमित गस्तीका क्रममा रोक्ने प्रयास गर्दा चालकले गाडी तिब्र गतिमा अघि बढाएर केही पर छाडेको र त्यसपछि फरार भएको प्रहरीले जनाएको छ। नियन्त्रणमा लिइएका कपडा र गाडी आवश्यक कारबाहीका लागि सिरहास्थित भन्सार कार्यालय ठाडीमा बुझाइएको छ।

सशस्त्र प्रहरी नायव उपरीक्षक तथा सह–प्रवक्ता शैलेन्द्र थापाले प्रेस विज्ञप्ति जारी गर्दै “गस्ती टोलीको चेकजाँचका क्रममा लत्ताकपडासहितको गाडी नियन्त्रणमा लिइएको” जानकारी दिएका छन्।

नेपाल–भारत सीमावर्ती क्षेत्र हुँदै अवैध रूपमा सामान भित्रिने क्रम रोक्न सशस्त्र प्रहरी बलले हालै नियमित चेकजाँच र निगरानीलाई कडाइ गरेको जनाएको छ। यसअघि पनि सीमावर्ती जिल्लाबाट लत्ताकपडा, औषधि तथा इलेक्ट्रोनिक सामान बरामद हुने क्रम दोहोरिँदै आएको छ, जसले भन्सार राजस्वमा नोक्सानी पुर्‍याउने सरकारी निकायहरूको चिन्ता बढाइरहेको छ।

यस घटनाले सीमापार व्यापारमा भन्सार प्रणालीलाई चक्मा दिने गतिविधि अझै सक्रिय रहेको देखाएको छ। नियन्त्रणमा लिइएको सामान र गाडीमा आवश्यक छानबिनपछि कानूनी प्रक्रिया अघि बढाइने प्रहरीको भनाइ छ।