काठमाडौं — शरीरमा पेट्रोल खन्याएर आत्मदाह प्रयास गरेकी गायिका नितु पौडेलको निधन भएको छ। जिल्ला प्रहरी परिसर काठमाडौंका प्रवक्ता एसपी पवनकुमार भट्टराईका अनुसार पौडेलको शुक्रबार बिहान ८:२० बजे कीर्तिपुरस्थित वर्न अस्पतालमा उपचारका क्रममा मृत्यु भएको हो।

गत शनिबार दिउँसो करिब साढे २ बजेतिर अनामनगरस्थित एक स्टुडियोमा पौडेलले आफ्नै शरीरमा पेट्रोल छर्केर आत्मदाह प्रयास गरेकी थिइन्। प्रहरीका अनुसार उनको शरीरको करिब ५५ प्रतिशत भाग जलेको थियो।

उक्त घटनाबारे अनुसन्धान अघि बढाएको प्रहरीले स्टुडियो सञ्चालक तथा गायक बाबुल भनिने धनबहादुर गिरीलाई नियन्त्रणमा लिएको छ। प्रहरीका अनुसार गिरी घटनास्थलमै उपस्थित थिए र उनको हात–खुट्टा पनि सामान्य रूपमा जलेको थियो।

प्रवक्ता भट्टराईका अनुसार, “गायक गिरीसँग घटनाबारे सोधपुछ भइरहेको छ। साथै, घाइते महिलाको परिवार, आफन्त र प्रत्यक्षदर्शीहरूलाई पनि बयानका लागि प्रहरीमा बोलाइएको छ।”

हालसम्म गिरीविरुद्ध औपचारिक जाहेरी दर्ता नभए पनि प्रहरीले घटनाको कारण र परिस्थितिबारे विस्तृत अनुसन्धान सुरु गरेको जनाएको छ।

पौडेलको मृत्युले नेपाली संगीत क्षेत्र शोकमग्न भएको छ। उनी केही वर्षदेखि निरन्तर गीत रेकर्डिङमा सक्रिय थिइन्। प्रहरी अनुसन्धानको निष्कर्षले घटनाको वास्तविक कारण सार्वजनिक गर्ने बताइएको छ।