युरोपेली सङ्घ (इयु) का परराष्ट्र नीति प्रमुख काया कालासले इरानको आणविक कार्यक्रमबारे बढ्दो विवादलाई समाधान गर्ने अवसरका रूपमा आगामी ३० दिनलाई लिनुपर्ने सुझाव दिनुभएको छ । शुक्रबार ब्रसेल्समा सञ्चारकर्मीसँग कुरा गर्दै उहाँले भन्नुभयो, “हामी अहिले ३० दिनको नयाँ चरणमा प्रवेश गर्दैछौँ, जसले सबै पक्षलाई सहमति खोज्ने र कूटनीतिक बाटो अपनाउने महत्वपूर्ण अवसर दिएको छ।”

फ्रान्स, बेलायत र जर्मनीले बिहीबार संयुक्त राष्ट्र संघ अन्तर्गतको प्रक्रिया सुरु गरेका छन्, जसअनुसार इरानमाथि ३० दिनभित्र अन्तर्राष्ट्रिय प्रतिबन्ध पुनः लाग्न सक्ने सम्भावना रहेको छ । ती मुलुकहरूले इरानले सन् २०१५ मा विश्व शक्तिसँग गरेको आणविक सम्झौताका प्रावधान उल्लङ्घन गरेको आरोप लगाएका छन् । सम्झौताअनुसार, इरानले आफ्नो आणविक कार्यक्रम सीमित गर्ने प्रतिबद्धता जनाएको थियो, जसको सट्टामा उसमाथि लगाइएका प्रतिबन्ध हटाइएको थियो ।

युरोपेली राष्ट्रहरूको यस कदमप्रति इरानले विरोध जनाएको छ । तेहरानले यसलाई विगतका कूटनीतिक प्रयासलाई कमजोर पार्ने कार्यका रूपमा व्याख्या गर्दै आवश्यक प्रतिक्रिया दिने चेतावनी दिएको छ ।

फ्रान्सका परराष्ट्र मन्त्री जाँ नोएल बारोले पनि इरानको आणविक गतिविधिप्रति चिन्ता बढ्दै गएको बताउँदै यसलाई अझ गम्भीर संकटमा नपुगोस् भन्ने चाहना व्यक्त गर्नुभयो । तर उहाँले प्रतिबन्ध सम्बन्धी प्रक्रिया सुरु हुनु कूटनीतिक प्रयासको अन्त्य होइन भन्ने स्पष्ट पार्नुभयो ।

संयुक्त राष्ट्र संघका अधिकारीहरूले भने हालको ३० दिनलाई अझै पनि समझदारी कायम गर्न सकिने संवेदनशील समयका रूपमा लिएका छन् । आगामी हप्तामा हुने वार्ताले इरान र पश्चिमी राष्ट्रबीचको सम्बन्धलाई कुन दिशामा लैजान्छ भन्ने कुराले अन्तर्राष्ट्रिय कूटनीतिक वातावरणलाई निर्णायक मोडमा पुर्‍याउने देखिन्छ ।