रुपन्देहीको भैरहवास्थित नापी कार्यालयमा कार्यरत नापी अधिकृत सुग्रीव यादवविरुद्ध अख्तियार दुरुपयोग अनुसन्धान आयोगले करिब छ करोड रुपैयाँ बराबरको भ्रष्टाचार मुद्दा दायर गरेको छ। आयोगका सहायक प्रवक्ता गणेशबहादुर अधिकारीका अनुसार यादवले २०५३ असार १३ गतेदेखि २०८१ असार १६ गतेसम्म सार्वजनिक पदमा कार्यरत रहँदा वैध आय र खर्चबीच ठूलो अन्तर देखिएको छ।

आयोगका तथ्यांकअनुसार सो अवधिमा यादव र उनको परिवारको वैध आय नौ करोड तीन लाख ९५ हजार ४४४ रुपैयाँ रहेको छ। यसमा तलब बचत, बैठक भत्ता, जग्गा बिक्री, ऋण, बैंक ब्याज, बीमा भुक्तानी, कृषि आम्दानी र सवारीसाधन बिक्रीबाट आएको रकम समावेश छ। तर त्यही अवधिमा उनको कुल खर्च १४ करोड ८३ लाख ५७ हजार ८८४ रुपैयाँ पुगेको देखिएको आयोगको भनाइ छ। खर्चमा जग्गा खरिद, घर निर्माण, शेयर खरिद, सवारीसाधन खरिद, कर्जा भुक्तानी, बीमा प्रिमियम, अध्ययन खर्च, व्यवसाय स्थापना र सुन खरिदजस्ता विवरण समावेश छन्।

आय र खर्चबीचको तुलना गर्दा यादवले पाँच करोड ७९ लाख ६२ हजार ४४० रुपैयाँ बराबरको सम्पत्ति श्रोतसिद्ध गर्न नसकेको आयोगले जनाएको छ। यस आधारमा भ्रष्टाचार निवारण ऐन, २०५९ बमोजिम यादवसँगै उनकी श्रीमती गायत्री यादव र छोराहरु सुधान्सु यादव तथा शुभम यादवलाई पनि प्रतिवादी बनाइ विशेष अदालत काठमाडौंमा शुक्रबार आरोपपत्र दायर गरिएको हो।

अख्तियारले पछिल्ला वर्षमा सरकारी कर्मचारीको सम्पत्ति विवरण छानबिन कडाइका साथ अघि बढाउँदै आएको छ। सुग्रीव यादवमाथिको मुद्दा सो अभियानकै निरन्तरता हो, जसले राज्य सेवामा पारदर्शिता र जवाफदेहिताबारे फेरि सार्वजनिक बहसलाई तीब्र बनाउने संकेत गरेको छ।