भदौ महिना लागेसँगै ताप्लेजुङबाट नयाँ अलैँची बजारमा आउन थालेको दुई सातामै मूल्य घटेको छ। सुरुमा प्रतिमन (४० किलो) ८८ हजार रुपियाँमा कारोबार हुँदै आएको अलैँची अहिले ८४ हजारमा झरेको ताप्लेजुङ उद्योग वाणिज्य सङ्घका अध्यक्ष भद्रबीर रेग्मीले जानकारी दिनुभयो। उहाँका अनुसार बिहीबारदेखि प्रतिमन चार हजार रुपियाँले मूल्य घटेको हो।

सदरमुकाम फुङ्लिङ बजारका व्यापारीसमेत रहेका रेग्मीले मूल्य घट्नुको स्पष्ट कारण भने अहिलेसम्म पहिचान नभएको बताए। नेपालमा उत्पादित अलैँची अन्तर्राष्ट्रिय बजारमै निर्भर हुने भएकाले त्यहाँको मूल्य घटबढाइँको असर देखिएको हुनसक्ने उहाँको भनाइ छ। फुङ्लिङका स्थानीय व्यापारी कमल बरालका अनुसार शनिबारसम्म पनि यही घटेको दरमै कारोबार भइरहेको छ।

यस वर्ष बजारमा निस्किँदै गर्दा सुरुमै अलैँचीको मूल्य उत्साहजनक थियो। गत वर्ष नयाँ फसल प्रतिमन ८२ हजार रुपियाँमा कारोबार भएकोमा यसपालि ८८ हजार पुग्दा किसान र व्यापारी दुवै उत्साहित बनेका थिए। तर दुई सातामै मूल्य घट्दा उनीहरू आशंका र निराशामा परेको देखिन्छ। स्थानीय किसान र व्यापारीहरूले विगतमा झैँ अस्वाभाविक उतारचढावभन्दा पनि स्थिर र उचित मूल्य आवश्यक रहेको प्रतिक्रिया दिएका छन्।

ताप्लेजुङ अलैँची उत्पादनको प्रमुख केन्द्र मानिन्छ। यहाँ नौ स्थानीय तह र ६१ वडामध्ये फक्ताङ्लुङ–७ ओलाङ्चुङगोला बाहेक सबै वडामा अलैँची खेती हुन्छ। कृषि ज्ञान केन्द्रका तथ्याङ्कअनुसार जिल्लामा हाल ४ हजार १६५ हेक्टर क्षेत्रमा अलैँची खेती भइरहेको छ। गत वर्ष यही क्षेत्रफलबाट २ हजार ५३१ मेट्रिक टन अलैँची उत्पादन भएको थियो। किसानका अनुसार यस वर्ष फल राम्रो नलागेकाले उत्पादन घट्ने सम्भावना छ।

असोजपछि मुख्य सिजन सुरु हुने भएकाले मूल्य अझै उतारचढाव हुनसक्ने अनुमान गरिएको छ। स्थानीय किसानले दीर्घकालीन स्थिर मूल्य प्रणालीमा जोड दिन थालेका छन्, जसले मात्रै नगदेबालीमा लगानी गर्नेको मनोबल कायम रहने उनीहरूको धारणा छ।