त्रिभुवन विश्वविद्यालयका उपकुलपति प्रा. डा. दीपक अर्यालले विश्वविद्यालयका विभिन्न क्याम्पस र कार्यालयमा रहेका पुस्तकालयलाई विद्युतीकरण गर्ने योजना अघि सारिएको जानकारी दिनुभएको छ। शुक्रबार १८औं पुस्तकालय दिवसका अवसरमा त्रिवि केन्द्रीय पुस्तकालयले आयोजना गरेको कार्यक्रममा उहाँले पुस्तकालयमा प्रविधिको विस्तारलाई अनिवार्य आवश्यकता भन्दै यसलाई प्राथमिकतामा राखिएको स्पष्ट पार्नुभयो।

उपकुलपति अर्यालका अनुसार पुस्तकालय ज्ञान, इतिहास र अनुसन्धानको धरोहर भएकाले यसको संरक्षण र आधुनिकीकरण दुवै जरुरी छ। उहाँले अध्ययन, अनुसन्धानात्मक जर्नल प्रकाशन तथा पुस्तकालय प्रणालीको सुधारमा त्रिवि केन्द्रीय पुस्तकालयले निर्वाह गर्दै आएको भूमिकालाई विशेष महत्व दिनुभयो।

कार्यक्रममा विज्ञान तथा प्रविधि अध्ययन संस्थानका पूर्व डिन प्रा. डा. विनिल अर्यालले नेपालमा अनुसन्धान लेख प्रकाशनको अवस्था र नेपाली जर्नल तथा अन्तर्राष्ट्रिय जर्नलबीचको अन्तरबारे कार्यपत्र प्रस्तुत गर्दै समीक्षा गर्नुभयो। यसैगरी मानवशास्त्र केन्द्रीय विभागका सहप्राध्यापक डा. मनबहादुर खत्री र पोटेन्ट मिडिया होमका कार्यकारी निर्देशक सुरेश रिजालले समेत आफ्नो कार्यपत्रमार्फत पुस्तकालय, अनुसन्धान र सञ्चारसम्बन्धी विभिन्न दृष्टिकोण प्रस्तुत गरेका थिए।

नेपालमा अनुसन्धानात्मक लेख प्रकाशन र पुस्तकालय व्यवस्थापन अझै चुनौतीपूर्ण रहेको कुरा कार्यक्रममा प्रष्ट भएको छ। त्रिवि नेतृत्वले प्राविधिक रूपान्तरणमार्फत पुस्तकालयलाई सशक्त बनाउन थालेको यो पहलले दीर्घकालीन रुपमा अनुसन्धान, अध्ययन र शैक्षिक संस्कृतिलाई कस्तो दिशा दिन्छ भन्ने प्रश्न भने अझै खुला छ।