काठमाडौंको कागेश्वरी मनोहरा नगरपालिका–१ स्थित कागेश्वरी धाममा भाद्र १५ गते लागेको कागे अष्टमी मेलामा सुरक्षात्मक व्यवस्था कडा पार्दै सशस्त्र प्रहरी बल, नेपालले सुरक्षाकर्मी परिचालन गरेको छ।

सशस्त्र प्रहरी बलका अनुसार मनसुन प्रतिकार्य बेस थलीबाट सशस्त्र प्रहरी सहायक निरीक्षक कृष्णकुमार भण्डारीको नेतृत्वमा १० जनाको टोली मेलास्थलमा खटाइएको हो। टोलीले विहानैदेखि मन्दिर परिसरमा सरसफाइ गर्ने कामसँगै मेलामा आउने भक्तजनको आवतजावतमा सहजता ल्याउने कार्य गरेको सशस्त्र प्रहरी बलले जनाएको छ।

मन्दिरमा दर्शनका लागि आउने वृद्धवृद्धा र बालबालिकालाई विशेष प्राथमिकता दिँदै टोलीले उनीहरूको हिँडडुल र दर्शनमा सहयोग गरेको छ। प्रहरीका अनुसार यस व्यवस्थाले भीडमा हुने धक्का–मुक्की कम गर्न र मेलाको वातावरणलाई व्यवस्थित बनाउन मद्दत गरेको छ।

कागे अष्टमी मेलामा राजधानीभित्रका मात्र होइन, उपत्यका बाहिरबाट समेत भक्तजन आउने परम्परा रहिआएको छ। भीड व्यवस्थापन र भक्तजनलाई सहज वातावरण उपलब्ध गराउन सशस्त्र प्रहरी बलको उपस्थिति थपिएको हो।

स्थानीयहरूका अनुसार हरेक वर्ष झैं यस वर्ष पनि मेलामा ठूलो संख्यामा श्रद्धालुहरूको भीड लागेको छ। मेलामा सुरक्षाकर्मीको सक्रिय सहभागिताले दुर्घटना न्यूनिकरणसँगै धार्मिक क्रियाकलाप शान्तिपूर्ण ढंगले सम्पन्न हुने अपेक्षा गरिएको छ।