रिलायवल नेपाल लाइफ इन्स्योरेन्स लिमिटेडले आफ्नो आठौं वार्षिक उत्सव सम्पन्न गर्दै नवौं वर्षमा प्रवेश गरेको छ। कम्पनीले यस अवसरमा बीमित, नियामक निकाय, शेयरधनी, कर्मचारी, पत्रकार र अन्य सरोकारवालाप्रति आभार व्यक्त गर्दै आगामी दिनमा ग्राहकमैत्री र दिगो सेवा विस्तार गर्ने प्रतिबद्धता प्रकट गरेको छ।

कम्पनीका अनुसार गत आर्थिक वर्षमा ५७ करोड रुपैयाँ बराबर नाफा आर्जन गरिएको छ। त्यस्तै नेपाल बीमा प्राधिकरणले तोकेको न्यूनतम चुक्ता पूँजी पूरा गर्दै चुक्ता पूँजी ५ अर्ब १९ करोड रुपैयाँ पुगेको जानकारी दिइएको छ। कम्पनीको कुल लगानी करिब २० अर्ब रुपैयाँ पुगेको छ भने गत आर्थिक वर्षमा १ अर्ब ४३ करोड रुपैयाँ दाबी भुक्तानी गरिएको छ। यी तथ्याङ्क कम्पनीले बीमा कारोबारमा आफ्नो सुदृढ अवस्थाको संकेतका रूपमा प्रस्तुत गरेको छ।

वार्षिकोत्सवको अवसरमा कम्पनीले काठमाडौंस्थित केन्द्रीय कार्यालयबाट प्रभातफेरी आयोजना गरेको थियो, जसमा कर्मचारी र एडभाइजरहरूको सहभागिता थियो। त्यस्तै देशभरका शाखाहरूमार्फत सामाजिक उत्तरदायित्वअन्तर्गत विभिन्न गतिविधि गरिएको कम्पनीले जनाएको छ। महेन्द्रनगर, धनकुटा, लहान र भैरहवामा रक्तदान तथा स्वास्थ्य शिविर, राजविराज, चितवन, सुन्दरबजार र मिर्चैयामा वृक्षारोपण, विराटनगर, सुर्खेत, बुटवल, गोरखा, धनगढी, दमौली, बनेपा र इलाममा विद्यालय तथा वृद्धाश्रमलाई शैक्षिक सामग्री, खाद्यान्न वितरण र सरसफाइ कार्यक्रम गरिएको हो।

कम्पनीले गत आठ वर्षको यात्राले आफूलाई अझ ठूलो जिम्मेवारीबोध गराएको उल्लेख गर्दै आगामी दिनमा सेवा सुधार र ग्राहकमैत्री कारोबारलाई उच्च प्राथमिकता दिने जनाएको छ। बीमा क्षेत्रलाई दुरदराजसम्म पुर्‍याउन योगदान गरेका एजेन्ट तथा कर्मचारीको भूमिकालाई कम्पनीले विशेष गरी प्रशंसा गरेको छ।

नेपालमा जीवन बीमाको पहुँच अझै विस्तार गर्नुपर्ने चुनौतीबीच रिलायवल नेपाल लाइफले प्रस्तुत गरेका प्रतिवद्धताले प्रतिस्पर्धी बजारमा कम्पनीलाई कस्तो प्रभाव पार्छ भन्ने प्रश्न अबका वर्षमा परीक्षित हुने देखिन्छ।