काठमाडौँ । नबिल बैंक लिमिटेडले निम्बजसँग साझेदारी गर्दै आफ्ना ग्राहकलाई डाटा ई–सिम र अन्तर्राष्ट्रिय ड्राइभिङ परमिट सेवासमेत एनबैंक मोबाइल एपमार्फत उपलब्ध गराउने भएको छ। सोमबार आयोजित कार्यक्रममा बैंकका नायब प्रमुख कार्यकारी अधिकृत आदर्श बाजगाईँ र निम्बजका निर्देशक ऋषभ तिमिल्सिनाले सम्झौतापत्रमा हस्ताक्षर गरे।

सम्झौतापछि नबिल बैंकका ग्राहकले चीन, भारत, अमेरिका, अष्ट्रेलिया, दुबई, थाइल्यान्ड, कतार, जापान, कोरिया, इटाली, फ्रान्स, क्यानाडासहित २०० भन्दा बढी देश र क्षेत्रमा एनबैंक एप प्रयोग गरेर अन्तर्राष्ट्रिय डाटा ई–सिम खरिद गर्न सक्नेछन्। बैंकका अनुसार यो सुविधा विशेषगरी विद्यार्थी, रोजगारीका लागि बाहिरिने तथा भ्रमणमा जाने यात्रुका लागि उपयोगी हुने अपेक्षा गरिएको छ।

बैंकका नायब प्रमुख कार्यकारी अधिकारी बाजगाईँले अन्तर्राष्ट्रिय भ्रमणमा सिम खरिद गर्दा हुने झन्झट, केवाइसी प्रक्रिया र विदेशी मुद्रा भुक्तानीका चुनौतीलाई समाधान गर्न यो सेवा सुरु गरिएको बताए। “ग्राहकले आफ्नो आवश्यकताअनुसारको डाटा प्याकेज एपमै छान्न सक्नेछन्, जसले यात्रा सहज र किफायती बनाउँछ,” उनले भने।

यससँगै बैंकले अन्तर्राष्ट्रिय ड्राइभिङ परमिट सेवासमेत एपमार्फत सुरु गर्ने भएको छ। संयुक्त राष्ट्रसंघको मापदण्डअनुसार तयार हुने उक्त अनुमतिपत्र १९० भन्दा बढी देशमा मान्य हुनेछ। ग्राहकले एपमार्फत आफ्नै चालक अनुमतिपत्र अपलोड गरी १० मिनेटभित्र आवेदन दिन सक्नेछन् भने २४ घण्टाभित्र डिजिटल वा फिजिकल कार्डका रूपमा अनुमतिपत्र प्राप्त गर्न सकिने बैंकले जनाएको छ। यस प्रक्रियामा थप परीक्षा दिनुपर्ने छैन।

निम्बजका निर्देशक तिमिल्सिनाले यो सहकार्यले अन्तर्राष्ट्रिय यात्रु, विद्यार्थी र वैदेशिक रोजगारीमा जाने नेपालीलाई “सीमापार आवागमनलाई सहज र तनावमुक्त” बनाउन योगदान पुर्‍याउने विश्वास व्यक्त गरे।

निम्बजले च्याट, भिडियो कल, सामाजिक सञ्जाल, लाइभ स्ट्रिमिङ, ओटिटि मूभी, किनमेल, डिजिटल वालेट, गेमलगायत विभिन्न सेवा एउटै प्लेटफर्ममा उपलब्ध गराउँदै आएको छ। नबिल बैंक भने देशभर २६८ शाखा र ३२१ एटिएममार्फत २५ लाखभन्दा बढी ग्राहकलाई सेवा दिँदै आएको अग्रणी वाणिज्य बैंक हो, जसले चार दशकदेखि नेपाली बैंकिङ क्षेत्रमा नयाँ–नयाँ सेवा ल्याउँदै आएको दाबी गर्दै आएको छ।