अमेरिकी राष्ट्रपति डोनाल्ड ट्रम्पले आफ्नो विशेष दूत स्टिभ विटकोफलाई आगामी हप्ता रुस पठाउने घोषणा गर्नुका साथै दुई आणविक पनडुब्बी अहिले ‘सो क्षेत्र’मा तैनाथ रहेको बताउँदै विश्व राजनीतिमा नयाँ तनाव पैदा गर्नुभएको छ।

ट्रम्पको यस्तो कदम रुसका पूर्वराष्ट्रपति मेदभेदेवसँगको अनलाइन विवादपछि आएको हो। यद्यपि ट्रम्पले पनडुब्बी राखिएको स्थान र उद्देश्यबारे स्पष्ट विवरण दिएका छैनन्। तर युक्रेन युद्ध अन्त्य गर्न रुसमाथि दबाब दिने प्रयासका रूपमा यस्तो तैनाथी भएको अनुमान गरिएको छ।

ट्रम्पले रुसलाई "अर्को साताको अन्त्यसम्म निर्णय लिन" अल्टिमेटम दिएका छन्, नभए थप अनिर्दिष्ट प्रतिबन्धहरू लाग्न सक्ने चेतावनीसहित। ट्रम्पले चीन र भारतसमेतलाई लक्षित गर्दै ‘अतिरिक्त कर’ लागु हुन सक्ने चेतावनी दिएका छन्, जुन कदमले रुसलाई अन्तर्राष्ट्रिय व्यापारमा अझै अलग पार्नेछ। तर यसले वैश्विक आपूर्ति सञ्जालमा व्यापक असर पार्न सक्ने जोखिम पनि उत्पन्न गराएको छ।

यता, राष्ट्रपति भ्लादिमिर पुटिनले भने आफ्ना अडानमा कुनै परिवर्तन नआएको जनाउँदै युक्रेन युद्ध अन्त्यका लागि शान्तिको आधार ठोस र स्थायी हुनुपर्ने शर्त दोहोर्याउनुभएको छ। चार वटा विवादास्पद क्षेत्रको स्वामित्व नछाड्ने अडान, युक्रेनले नेटोमा सामेल नहुने सुनिश्चितता, र सुरक्षाको प्रत्याभूति चाहिएको पुटिनको भनाइ यथावत् छ।

सो बीच, युक्रेनी सेनाले रुसको सोचीस्थित तेल डिपोमा ड्रोन आक्रमण गरेपछि रुसको रक्षा मन्त्रालयले ६१ युक्रेनी ड्रोन खसालेको दाबी गरेको छ। खेरसनमा रुसी गोलाबारीले एक नागरिकको ज्यान गएको छ भने, जेलेन्स्की प्रशासनले एक हजार २०० युक्रेनी युद्धबन्दी स्वदेश फर्काउने तयारी भइरहेको जनाएको छ।

सन् २०२२ को फेब्रुअरीमा सुरु भएको युद्ध तीन वर्ष नाघिसक्दा पनि अन्त्यको सम्भावना अझै टाढा देखिएको छ। ट्रम्पले युद्ध चाँडै सकिने दाबी गरे पनि, पुटिनको यथास्थितिवादी नीति र युक्रेनको आक्रमण प्रतिकार रणनीतिले अवस्था उल्टो दिशातर्फ उन्मुख छ।

यो अवस्थाले आणविक शक्ति प्रदर्शन र कूटनीतिक दूत पठाउने कदमबीच युद्धमा गम्भीर मोड ल्याउन सक्ने देखिएको छ।