अमेरिकी राष्ट्रपति डोनाल्ड ट्रम्पले भारतलाई रुसबाट तेल आयात नगर्न चेतावनी दिएका छन्। यदि भारतले अटेरी गरेमा हालको २५ प्रतिशत भन्सार शुल्क अझ बढाउने धम्कीसमेत उनले दिएका हुन्। ट्रम्पको यो चेतावनीले भारत–अमेरिका व्यापारिक सम्बन्धमा तनाव थपिएको छ।

यसको जवाफमा भारतको विदेश मन्त्रालयले अमेरिका र युरोपेली संघ आफैंले रुससँग व्यापार गरिरहेकाले भारतलाई मात्रै दण्डित गर्नु स्वीकार्य नहुने स्पष्ट पारेको छ। मन्त्रालयका अनुसार भारतलाई अनुचित रूपमा निशाना बनाउने काम भइरहेको छ।

दिल्लीले अमेरिकामाथि दोहोरो मापदण्ड अपनाएको आरोप लगाउँदै भनेको छ-"अमेरिकाले आफ्ना परमाणु प्लान्टका लागि युरेनियम, इलेक्ट्रिक सवारी साधनका लागि प्यालेडियम र कृषि प्रयोजनका लागि रासायनिक मल रुसबाट आयात गरिरहेको छ।"

यही सन्दर्भमा एक पत्रकारले राष्ट्रपति ट्रम्पसँग सोधे, “भारत भन्छ कि अमेरिका स्वयं रुससँग युरेनियम र मल किन्छ, तर उसले रुसबाट ऊर्जा खरिद गर्दा भारतको आलोचना गर्छ।

तपाईंको प्रतिक्रिया के हो?” जवाफमा ट्रम्पले भने, “मलाई यसबारे केही थाहा छैन। म यो विषयमा बुझेर तपाईंलाई जानकारी दिन्छु।” उता, युक्रेन युद्धपछि पश्चिमी प्रतिबन्धको मार खेपिरहेको मस्कोले चीन, भारतलगायतका देशहरूलाई कच्चा तेल तुलनात्मक रूपमा सस्तो मूल्यमा आपूर्ति गर्दै आएको छ।