ब्राजिलले संयुक्त राज्य अमेरिकाले अन्तर्राष्ट्रिय व्यापार नियमको उल्लङ्घन गरेको आरोप लगाउँदै विश्व व्यापार सङ्गठन (डब्लुटिओ) मा परामर्शका लागि औपचारिक अनुरोध गरेको छ।

ब्राजिलको विदेश मन्त्रालयद्वारा सार्वजनिक विज्ञप्तिमा भनिएको छ, “संयुक्त राज्य अमेरिकाले डब्लुटिओमा गरिएका प्रमुख प्रतिबद्धता—विशेषतः ‘सबैभन्दा मनपर्ने राष्ट्र’ (Most Favoured Nation) सिद्धान्त र करको अधिकतम सीमा (tariff bound rates) को उल्लङ्घन गरेको छ।” अमेरिकाले हाल मासु, कफी लगायतका ब्राजिलियन वस्तुहरूमा ५० प्रतिशतसम्मको भन्सार लगाएको जनाइएको छ, जुन यसअघि सुन्तलाको जुस, तेल र मलजस्ता प्रमुख वस्तुहरूमा छुट दिइएको थियो।

ब्राजिलको विकास, उद्योग, व्यापार र सेवा मन्त्रालयका अनुसार अमेरिकामा हुने कुल निर्यातमध्ये लगभग एक तिहाइ अब नयाँ भन्सारको असरमा परेको छ। यस्तैमा ब्राजिलले डब्लुटिओको विवाद समाधान संयन्त्र अन्तर्गत पहिलो चरणको प्रक्रिया सुरु गर्दै परामर्शको माग गरेको हो।

डब्लुटिओ नियमअनुसार यो प्रारम्भिक परामर्श प्रक्रिया द्विपक्षीय वार्ताको अवसर हो, जसले समाधानको सम्भावना खोज्न मद्दत गर्छ। यदि सहमति भएन भने मुद्दा औपचारिक विवाद समाधान प्यानलमा पुग्न सक्छ।

यस सन्दर्भमा ब्राजिलका राष्ट्रपति लुइज इनासिओ लुला दा सिल्भाले अमेरिकी राष्ट्रपति डोनाल्ड ट्रम्पमाथि गम्भीर आरोप लगाएका छन्। लुलाले ट्रम्पले वार्ताबाट टाढा भागिरहेको भन्दै अमेरिकालाई एकपक्षीय निर्णयमार्फत अन्तर्राष्ट्रिय व्यापार कानुनको अपमान गरेको टिप्पणी गरेका छन्।