हराएका नेपालीको खोजीमा परराष्ट्रमन्त्री आरजुको कूटनीतिक सक्रियता
भारतको उत्तराखण्डमा केही दिनअघि आएको विनाशकारी बाढीमा परेर हराएका नेपाली नागरिकको खोजी तथा उद्धारका लागि नेपाल सरकारले कूटनीतिक पहल सुरु गरेको छ ।
परराष्ट्रमन्त्री डा. आरजु राणा देउवाले यस विषयमा औपचारिक रूपमा जानकारी दिँदै नयाँ दिल्लीस्थित नेपाली राजदूतावासलाई तत्काल समन्वय गर्न निर्देशन दिइसकेको बताउनुभएको छ ।
सामाजिक सञ्जालमार्फत प्रतिक्रिया जनाउँदै परराष्ट्रमन्त्री डा. राणाले बाढीमा नेपाली नागरिक पनि बेपत्ता भएको खबरले आफूलाई अत्यन्त दुःखी तुल्याएको उल्लेख गर्दै हराएका नेपालीको जीवनरक्षा नै अहिलेको प्राथमिकता भएको बताउनुभयो ।
“भारत सरकारको समन्वयमा यथाशीघ्र उद्धारको प्रयास अघि बढाउन राजदूतावासलाई तदारुकताका साथ लाग्न निर्देशन दिएकी छु,” मन्त्री डा. राणाले लेख्नुभएको छ । उहाँले बाढी र पहिरोका कारण ज्यान गुमाउने सबैप्रति श्रद्धाञ्जली अर्पण गर्दै पीडित परिवारप्रति गहिरो समवेदना व्यक्त गर्नुभएको छ ।
भारतको उत्तराखण्ड क्षेत्रमा हालै आएको अविरल वर्षासँगै आएको बाढी र पहिरोले ठूलो जनधनको क्षति पुर्याएको समाचार आएका छन् ।
यसैबीच केही नेपाली नागरिकसमेत सम्पर्कविहीन भएको सूचना आएपछि परराष्ट्र मन्त्रालय कूटनीतिक तहमा सक्रिय भएको हो ।
