राष्ट्रपतिबाट जनै पूर्णिमा र रक्षाबन्धनको शुभकामना
राष्ट्रपति रामचन्द्र पौडेलले जनै पूर्णिमा, ऋषितर्पणी एवम् रक्षाबन्धनको अवसरमा देश–विदेशमा रहेका सम्पूर्ण नेपालीहरूमा सुख, शान्ति, सुस्वास्थ्य र प्रगतिका लागि मंगलकामना व्यक्त गर्नुभएको छ।
आज जारी शुभकामना सन्देशमा राष्ट्रपतिले नवयज्ञोपवित एवम् रक्षाबन्धन धारण गरेर मनाइने यस पर्वले आपसी सम्बन्ध र सद्भाव प्रगाढ बनाउने विश्वास व्यक्त गर्नुभयो।
उहाँले जनै पूर्णिमा र ऋषितर्पणीको विशेष महत्त्व रहेको उल्लेख गर्दै विभिन्न जातजाति, भाषा, संस्कृति र परम्पराले भरिपूर्ण नेपालमा यस्ता चाडपर्वहरूले मित्रता, प्रेम, सद्भाव अभिवृद्धि गर्दै राष्ट्रिय एकतालाई सुदृढ बनाउने विश्वास पनि व्यक्त गर्नुभयो।
