सिन्धुलीको गोलन्जोर गाउँपालिका–३, खुर्कोटस्थित सुनकोशी नदीमा निर्माण गरिएको बेलिब्रिज नेपाली सेनाले मर्मत सम्पन्न गरेको छ। सिन्धुली र रामेछाप जोड्ने यो पुलमा नटबोल्ट खुस्किएर बिछ्याइएका पाता खुकुलो भएपछि जोखिम बढेको थियो। सेनाको ९ नम्बर बाहिनी, सिन्धुलीमाढीका अनुसार मध्यपूर्वी पृतना हेडक्वार्टर अन्तर्गतको कालिसिद्धी गणको प्राविधिक टोलीले बिहीबार र शुक्रबार प्राविधिक परीक्षणसहित मर्मत कार्य सम्पन्न गरेको हो।

स्थानीयका अनुसार यातायातको चापसँगै पुल हल्लिन थालेको र वारपार गर्न डर लाग्दो अवस्था बनेको थियो। खुर्कोट–मन्थली सडकअन्तर्गत पर्ने यो पुलको दुई स्पानमध्ये गत वर्ष असोज १२ गतेको बाढीले रामेछापतर्फको ५० मिटर स्पान बगाएपछि असोज २० गतेदेखि नेपाली सेनाले तत्कालीन आपतकालीन समाधानस्वरूप बेलिब्रिज जडान सुरु गरेको थियो।

सडक डिभिजन कार्यालय खाल्टे, सिन्धुलीका अनुसार पुलको भारवहन क्षमता २२ टन भए पनि हाल १५ टन क्षमताका सवारीसाधन मात्र चलाउन अनुमति छ। तर, स्थानीयका भनाइमा अझै बढी तौलका गाडी पनि पुलबाट गुज्रिरहेका छन्, जसले मर्मतपश्चात पनि दीर्घकालीन संरचना सुरक्षामा प्रश्न उठाएको छ।

यो पुल एशियाली विकास बैंकको १७ करोड रुपैयाँभन्दा बढी सहयोगमा सडक सञ्जाल सेक्टर आयोजनामार्फत २०७१/७२ मा दुई स्पानसहित निर्माण भएको हो। रामेछाप, दोलखा, सोलुखुम्बु र ओखलढुङ्गाका केही भागलाई तराईसँग जोड्ने बीपी राजमार्ग र मध्यपहाडी राजमार्गका लागि खुर्कोटस्थित सुनकोशी नदीको पुल ‘जीवनरेखा’ भएको गोलन्जोर गाउँपालिकाका अध्यक्ष शंकर बराल बताउँछन्। उनका अनुसार यो संरचनाले हिमाल, पहाड र तराईको आवतजावत र आर्थिक गतिविधि सहज बनाएको छ।