पाँच महिनापछि अन्तरिक्ष यात्रीहरूको पृथ्वी फर्किने यात्रा सुरु
पाँच महिना लामो अन्तर्राष्ट्रिय अन्तरिक्ष स्टेशन (आईएसएस) बसाइपछि नासाको क्रु–१० अन्तरिक्ष मिशनमा सहभागी चार जना अन्तरिक्ष यात्री शुक्रबारदेखि पृथ्वी फर्कने यात्रामा निस्किएका छन्।
नासाका अनुसार उनीहरू सवार अन्तरिक्ष यान शुक्रबार साँझ ६ः१५ बजे (पूर्वी समय) आईएसएसको हार्मोनी मोड्युलबाट सफलतापूर्वक अलग भएको हो। सो यान शनिबार बिहान ११ः३३ बजे अमेरिकाको क्यालिफोर्नियाको समुद्री तट नजिक अवतरण हुने तालिका छ।
यस मिशनमा नासाका दुई महिला अन्तरिक्ष यात्री एनी म्याकक्लेन र निकोल एयर्स, जापान अन्तरिक्ष अनुसन्धान संस्था (जाक्सा) का टाकुया ओनिशी र रुसका अन्तरिक्ष यात्री किरिल पेस्कोभ सहभागी छन्।
स्पेसएक्सको सहकार्यमा सञ्चालित क्रु–१० नासाको व्यावसायिक अन्तरिक्ष यात्री आदान–प्रदान कार्यक्रमअन्तर्गतको दशौँ औपचारिक उडान हो, जसले विभिन्न मुलुकका अन्तरिक्ष यात्रीहरूलाई अन्तर्राष्ट्रिय अन्तरिक्ष स्टेशनमा पठाउँदै आएको छ।
