अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबिच युक्रेन युद्ध अन्त्यका लागि आगामी शुक्रबार (अगस्ट १५) अमेरिकाको अलास्का राज्यमा भेटवार्ता हुने भएको छ । ट्रम्पले दोस्रो कार्यकालपछि बारम्बार “२४ घण्टामै युद्ध सकाउने” दाबी गर्दै आएका छन् ।

बैठकको घोषणा उहाँले आफ्नै सामाजिक सञ्जाल ट्रुथ सोसल मार्फत गरेका हुन्, जसलाई क्रेमलिनले पनि पुष्टि गरेको छ । ट्रम्पले पुटिन–जेलेन्स्की दुवैलाई “हत्या रोक्ने” जुनसुकै प्रयास गर्न तयार रहेको बताए ।

अलास्का सन् १८६७ मा रसियाबाट अमेरिकाले खरिद गरेको थियो । भौगोलिक रूपमा अलास्काको पश्चिमी किनारा र रसियाको पूर्वी भूभागबीच केवल बेरिङ जलसन्धि पर्छ । क्रेमलिनका सल्लाहकार युरी उशाकोभका अनुसार अलास्का र आर्कटिक क्षेत्रमा दुवै मुलुकका आर्थिक हितहरू छन् र सहकार्यको सम्भावना उच्च छ ।

युक्रेनी राष्ट्रपति भोलोदीमिर जेलेन्स्कीले बैठकलाई त्रिपक्षीय बनाउन चाहेका छन् । तर रसियाले युक्रेनसँग प्रत्यक्ष वार्ता केवल वार्ताको अन्तिम चरणमा मात्र सम्भव हुने अडान लिएको छ । ट्रम्पले पनि जेलेन्स्कीको अनिवार्य सहभागिताको पक्षमा आफू नरहेको बताएका छन् ।

 पुटिनमाथि अन्तर्राष्ट्रिय फौजदारी अदालत (आइसिसी)ले जारी गरेको पक्राउ आदेशका कारण बैठक स्थल चयनमा चुनौती थियो । यसअघि यूएई, टर्की, चीन र भारत सम्भावित स्थलको रूपमा चर्चामा थिए । ट्रम्प–पुटिन अन्तिम भेट २०१९ मा जी–२० सम्मेलन (जापान) मा भएको थियो । २०१८ मा फिनल्यान्डको हेलसिंकीमा दुबै नेताले महत्त्वपूर्ण वार्ता गरेका थिए । 

युक्रेन युद्ध अन्त्यका लागि रसियाले चार शर्त राखेको छ — कब्जा गरिएका चार क्षेत्र खाली गर्न, युक्रेनले तटस्थ राष्ट्रको हैसियतमा रहनु पर्ने, पश्चिमी सैन्य सहायता अस्वीकार गर्नुपर्ने र नेटोमा नजाने प्रतिबद्धता जनाउनुपर्ने । पश्चिमी मुलुक र युक्रेन भने तत्काल युद्धविरामको पक्षमा छन् ।