गुल्मीको रुद्रवेणी–वामी सडकखण्डको सत्यवती गाउँपालिका–६ स्थित डहरले खोलाले दशकौँदेखि स्थानीय र यात्रुलाई त्रासमा पारेको छ।

सधैंजसो लेदो र बाढीले सडक अवरुद्ध पार्ने, सवारीसाधन बगाउने र जनधनको क्षति गराउने यो स्थान चार दशकभन्दा बढी समयदेखि ‘खतराको मोड’को रूपमा परिचित छ। स्थानीयका अनुसार डहरलेमा पहिलो पटक ठूलो पहिरो २०३२ सालमा खसेको थियो। त्यसयता हरेक वर्ष बर्खामा पहिरो खस्ने क्रम रोकिएको छैन।

रिडी–रुद्रवेणी–वामीटक्सार सडकको विस्तार २०३५ सालमा भए पनि यहाँको समस्या समाधान हुने पहल कहिल्यै देखिएन। अघिल्लो हप्ता मात्र पत्रकार घनश्याम गौतमको कार यसै खोलाले बगायो। यस्ता घटना वर्षौंदेखि दोहोरिँदै आएका छन्।

स्थानीय चालकले यो स्थान पार गर्न डराउँदै, कहिलेकाहीँ घण्टौं पर्खेर मात्र यात्रा गर्नुपर्ने अवस्था छ। समस्या समाधानका लागि केही वर्षअघि पुल निर्माण सुरु गरिएको थियो। तर, ठेकदारलाई भुक्तानी रकम नदिँदा काम बीचमै रोकिएको छ।

यसले दीर्घकालीन समाधानको आशा गरेको स्थानीयलाई फेरि निराश बनाएको छ। “४७ वर्षदेखि हामीले यो खोलाको पीडा खेपिरहेका छौं, सरकारले आश्वासन त दिन्छ, तर काम अधुरै हुन्छ,” स्थानीयवासीहरूको गुनासो छ।

विशेषज्ञहरूको भनाइमा, पहिरो र बाढी नियन्त्रणका लागि तत्काल पक्की संरचना निर्माण, जलनिकासको उचित व्यवस्था, र पुल निर्माण कार्य पुनः सुरु गर्नु अपरिहार्य छ।