तेस्रो अन्तर्राष्ट्रिय ताप्लेजुङ गोल्डकपको पहिलो खेलमा द योङ ब्रदर्स क्लब, इटहरीले शानदार सुरुवात गरेको छ।

शनिबार भानु जनमाध्यमिक विद्यालयको खेलमैदानमा भएको उद्घाटन खेलमा इटहरीको टोलीले आयोजक तेल्लोक स्पोर्टिङ क्लबलाई २–१ ले हराउँदै क्वाटरफाइनल प्रवेश पक्का गरेको हो। प्रतियोगिताअन्तर्गत आइतबारको खेलमा सहारा क्लब पोखरा र रेड स्टार फुटबल क्लब झापा आमनेसामने हुनेछन्।

त्यसपछि साउन २७ गते क्वाटरफाइनलको अन्तिम खेलमा सलहेस युवा क्लब, सिराहा र फिदिम स्पोर्टिङ क्लब, पाँचथरबीच भिडन्त हुनेछ। यस वर्षको गोल्डकपमा भारतको एकसहित नेपालका चार प्रदेशका प्रतिष्ठित क्लबको सहभागिता छ। फाइनल खेल साउन ३१ गते हुनेछ।

विजेताले नगद ७ लाख दुई हजार ८२ रुपैयाँसहित ट्रफी, मेडल र प्रमाणपत्र पाउनेछन् भने उपविजेताले तीन लाख ५० हजार ८२ रुपैयाँ प्राप्त गर्नेछन्। खेलको सर्वोत्कृष्ट खेलाडीले बाइक पुरस्कार स्वरूप पाउनेछ।