युरोपेली केन्द्रीय बैंक (ईसीबी) की प्रमुख क्रिस्टिन लेगार्डले अमेरिकी राष्ट्रपति डोनाल्ड ट्रम्पले फेडरल रिजर्भमाथि प्रत्यक्ष नियन्त्रण स्थापित गर्ने सम्भावित प्रयासलाई विश्व अर्थतन्त्रकै लागि खतरनाक संकेतका रूपमा चित्रण गर्नुभएको छ। फ्रान्सको रेडियो क्लासिक सँग सोमबार दिएको अन्तर्वार्तामा उहाँले चेतावनी दिँदै भन्नुभयो, “यदि मौद्रिक नीति कुनै एक व्यक्तिको आदेशमा निर्भर हुन्छ भने, अमेरिकी अर्थतन्त्रको सन्तुलन मात्र होइन, यसको विश्वव्यापी प्रभाव पनि निकै चिन्ताजनक हुन्छ।”

समसामयिक विवाद ट्रम्पको फेडरल रिजर्भ बोर्डकी गभर्नर लिसा कुकलाई हटाउने सम्भावित प्रयाससँग जोडिएको छ। आलोचकहरूको भनाइमा, ट्रम्प कम ब्याजदरको पक्षधर व्यक्तिहरूलाई नियुक्त गरेर केन्द्रीय बैंकको नीति आफ्ना राजनीतिक हितअनुरूप मोड्न चाहनुहुन्छ। तर लेगार्डले यसलाई सहज प्रक्रिया नभएको उल्लेख गर्दै भनिन्, “फेडको नीतिनिर्माण निकायमा बहुमतलाई पूर्णरूपमा आफ्नो पक्षमा पार्न उहाँका लागि धेरै कठिन हुनेछ।”

ईसीबी प्रमुखका अनुसार, केन्द्रीय बैंकको प्राथमिक भूमिका मूल्य स्थिरता कायम राख्नु र दीर्घकालीन रोजगारी सुरक्षित गर्नु हो, जुन संस्थागत स्वतन्त्रतामाथि आधारित रहन्छ। यो स्वतन्त्रता नै मौद्रिक नीतिको विश्वासनीयता र दीर्घकालीन प्रभावकारिताको आधार हो।

अमेरिकी अर्थतन्त्रको आकार र यसको विश्वव्यापी प्रभावलाई ध्यानमा राख्दै, लेगार्डले देखाउनुभएको चिन्ता युरोपेली दृष्टिकोण मात्र नभई अन्तर्राष्ट्रिय सरोकार पनि हो। ट्रम्पको कदम सफल हुने वा नहुने समयले देखाउने भए पनि, यसबारे उब्जिएको बहसले केन्द्रीय बैंकहरूको स्वतन्त्रता र विश्वव्यापी आर्थिक स्थायित्वको संवेदनशील सम्बन्धलाई पुनः सतहमा ल्याएको छ।