शिक्षा मन्त्रालयमा नयाँ संस्कार: महावीर पुनले रोकिदिए औचित्यहीन समितिहरू!
नवनियुक्त शिक्षा, विज्ञान तथा प्रविधिमन्त्री महावीर पुनले पदभार ग्रहण गर्दै मन्त्रालयका कर्मचारीलाई औचित्यहीन समिति बनाउने परम्परा अन्त्य गर्न आग्रह गरेका छन्। सोमबार केशरमहलस्थित मन्त्रालयमा पदभार सम्हाल्ने क्रममा उनले कामलाई प्रत्यक्ष परिणाममुखी बनाउनुपर्ने भन्दै अनावश्यक समितिहरूले मन्त्रालयको ऊर्जा खेर जाने उल्लेख गरे।
मन्त्रालयका अधिकारीहरूले पदभार ग्रहणको पहिलो दिनमै नयाँ समितिमा हस्ताक्षर गर्न अनुरोध गर्दा मन्त्री पुनले त्यसमा अनिच्छा जनाउँदै नाम मात्रका संरचनाले वास्तविक परिवर्तन नल्याउने प्रष्ट पारे। उनका अनुसार समिति सदस्य भएर औपचारिक बैठक बस्ने वा भिजिटिङ कार्डमा पद थप्ने प्रवृत्ति भन्दा अब ठोस कार्यान्वयनलाई प्राथमिकता दिनुपर्ने समय आएको हो।
पुनले विद्यालय शिक्षा ऐनबारे विज्ञहरूको विशेष टिम गठन गरेर सुधारका कदम अघि बढाउने तयारी रहेको बताए। साथै, भ्रष्टाचार नियन्त्रण र सुशासन सुनिश्चित गर्ने प्रक्रियामा १६ देखि ३० वर्ष उमेर समूहका युवालाई सक्रिय सहभागी गराउने योजनासमेत सार्वजनिक गरे।
उनले कर्मचारीतन्त्रलाई हस्तक्षेपविहीन वातावरणमा परिणाममुखी ढंगले काम गर्न आग्रह गर्दै, यसपटकको कार्यशैलीले शिक्षाक्षेत्रमा ठोस सुधारका संकेत दिने विश्वास व्यक्त गरे।
