काठमाडौंमा बिहीबार आयोजित कार्यक्रममा संयुक्तराज्य अमेरिकाले नेपाली सेनालाई दुईवटा स्काइ ट्रक (हेलिकोप्टर) हस्तान्तरण गरेको छ। उक्त समारोहमा परराष्ट्रमन्त्री डा. आरजु राणा देउवाले नेपाल–अमेरिका सम्बन्धलाई विश्वासमा आधारित, दिगो र ऐतिहासिक साझेदारीको रूपमा व्याख्या गर्दै अमेरिकाको सहयोगलाई मित्रता र सहकार्यको प्रतीक भनेकी थिइन्।

डा. राणाले प्रजातान्त्रिक शासन प्रणालीको सुदृढीकरणदेखि मानवतावादी सहयोग, विपद् व्यवस्थापन, शान्ति स्थापना र क्षमता विकाससम्मका क्षेत्रमा अमेरिकाले नेपाललाई विश्वसनीय विकास साझेदारका रूपमा साथ दिएको उल्लेख गरिन्। उनले नेपाललाई निरन्तर सहयोग गरिरहेको अमेरिकी सरकार र जनताप्रति आभार व्यक्त गर्दै, अमेरिका–नेपाल सम्बन्ध शान्ति, स्थायित्व र मानव सेवामा केन्द्रित रहेको प्रष्ट पारिन्।

समारोहमा रक्षामन्त्री मानवीर राई र प्रधान सेनापति अशोकराज सिग्देल पनि उपस्थित थिए। अमेरिकी राजदूत डिन आर. थम्पसनले औपचारिक रूपमा स्काइ ट्रक हस्तान्तरण गरेका थिए। मन्त्री राणाले अनुशासन, समर्पण र राष्ट्रियताको भावनासहित विश्व शान्ति र सुरक्षाप्रति निरन्तर प्रतिबद्ध रहँदै आएको भन्दै नेपाली सेनाको प्रशंसा पनि गरिन्।

स्काइ ट्रकहरू उद्धार कार्य र विपद् व्यवस्थापनमा प्रयोग गर्न मिल्ने भएकोले यसले नेपालको क्षमतामा थप बल पुर्‍याउने अपेक्षा गरिएको छ। नेपाली सेनाले यसलाई एयर एम्बुलेन्सको रूपमा पनि सञ्चालन गर्न सक्ने जनाएको छ।