हालै काभ्रेपलान्चोक जिल्लाका विभिन्न नगरपालिकाहरूमा आएको भीषण पहिरोले गम्भीर मानवीय र भौतिक क्षति पुर्‍याएको  छ। बेनिघाट गाउँपालिका, रोशी गाउँपालिका, मण्डन देउपुर नगरपालिका, नमोबुद्ध तथा तिमाल गाउँपालिका जस्ता क्षेत्रहरू पहिरोबाट प्रत्यक्ष प्रभावित भएका छन्। प्रभावित जनताको सहयोगका लागि नेपाल भारत मैत्री संघले तत्कालै सक्रिय पहल गरिरहेको छ।

मिति २०८१ असोज १६ गते, संघले भारतीय दूतावासको सहकार्यमा राहत सामग्रीहरू वितरण गरेको हो। यस क्रममा ४५० थान कम्बल, ४२५ थान झुल, साथै औषधी तथा आवश्यक सामग्रीहरू वितरण गरिएका थिए। राहत सामग्री वितरण कार्यक्रम नेपाल भारत मैत्री संघको जिल्ला शाखाका सभापति श्री विश्वराम श्रेष्ठको नेतृत्वमा सम्पन्न भएको थियो। वितरण कार्यमा स्थानीय तहको प्रमुख भूमिकामा पनैती नगरपालिकाका प्रमुख श्री रामनारायण गण्डरियजलाई सामग्रीहरू हस्तान्तरण गरिएको थियो।

कार्यक्रमको व्यवस्थापनमा नेपाल भारत मैत्री संघका महासचिव बोककृष्ण सुवेदीको विशेष पहल रहेको थियो। उनले भारतीय दूतावासको सहकार्यमा राहत सामग्रीको वितरणलाई प्रभावकारी बनाउन ठोस कदम चालेका थिए। संघले यस विपत्तिमा पीडित जनताको पक्षमा सहानुभूति प्रकट गर्दै, संकटको समयमा आवश्यक सहयोग उपलब्ध गराउन सक्रिय रहेको बताएको छ।

संघले पहिरोबाट प्रभावित सबै पीडित परिवारप्रति भावपूर्ण श्रद्धाञ्जली अर्पण गर्दै उनीहरूलाई धैर्य धारण गर्न आग्रह गरेको छ। साथै, राहत कार्यक्रमलाई निरन्तरता दिँदै अन्य प्रभावित क्षेत्रहरूमा पनि सहयोग पुर्‍याउने प्रतिबद्धता जनाएको छ।

संघको यो मानवीय प्रयासले प्राकृतिक विपत्तिका बेला जनताको पक्षमा सहयोग पुर्‍याउने महत्त्वपूर्ण भूमिका खेलेको छ, जसले आपतकालीन परिस्थितिमा नेपाल र भारतबीचको मैत्री सम्बन्धलाई अझ बलियो बनाउने विश्वास गरिएको छ।

(स्रोत: नेपाल भारत मैत्री संघ, प्रेस विज्ञप्ति)