काठमाडौं — राष्ट्रिय स्वतन्त्र पार्टीका सभापति रवि लामिछानेले प्रहरी हिरासतमा रहँदा दिएको एक कडा राजनीतिक अभिव्यक्ति फेरि चर्चामा आएको छ। सहकारी ठगी प्रकरणसँग जोडिएको मुद्दामा हिरासतमा रहेका बेला लामिछानेले तत्कालीन प्रधानमन्त्री केपी शर्मा ओली नेतृत्वको सरकारमाथि गम्भीर आरोप लगाउँदै देशभरका “न्यायप्रेमी जनता”लाई सरकारविरुद्ध उभिन अपिल गरेका थिए।

त्यतिबेला दिएको उनको वक्तव्यमा उनले अदालतप्रति विश्वास व्यक्त गर्दै भनेका थिए कि सरकार भ्रष्टाचार संरक्षणमा लागेको छ, निर्दोषलाई झुटा मुद्दामा फसाइँदैछ र राज्यसत्ताको दुरुपयोग भइरहेको छ। उनले यसलाई “अन्तिम लडाइँ”को संज्ञा दिँदै सरकारको विरोध गर्न देशभर आह्वानसमेत गरेका थिए।

उक्त वक्तव्यका बेला केपी शर्मा ओली प्रधानमन्त्री थिए भने रवि लामिछाने प्रहरी हिरासतमा थिए। लामो समयदेखि चलिरहेको मुद्दामा आज उच्च अदालत तुलसीपुरले लामिछानेलाई रिहा गर्ने आदेश दिएपछि उक्त अभिव्यक्ति पुनः सार्वजनिक बहसमा आएको हो।

संयोगवश, आजकै दिन नेकपा एमालेको ११औँ महाधिवेशनबाट केपी शर्मा ओली पुनः पार्टी अध्यक्षमा निर्वाचित भएका छन्। एकातर्फ ओलीको राजनीतिक पुनरागमन र अर्कोतर्फ लामिछानेको कानुनी राहतले नेपाली राजनीतिमा नयाँ तरंग सिर्जना गरेको विश्लेषण हुन थालेको छ।

राजनीतिक विश्लेषकहरूका अनुसार प्रहरी हिरासतमा दिएको लामिछानेको अभिव्यक्ति भावनात्मक र राजनीतिक दुवै दृष्टिले अर्थपूर्ण थियो। अहिले अदालतको निर्णयसँगै त्यो वक्तव्यलाई कतिपयले “दूरदर्शी चेतावनी”का रूपमा व्याख्या गरिरहेका छन् भने कतिपयले त्यसलाई परिस्थितिजन्य आक्रोश मात्र ठानिरहेका छन्।

उच्च अदालतको आदेशपछि लामिछानेको आगामी राजनीतिक भूमिका र ओली नेतृत्वको एमालेसँगको सम्बन्धले अबको राजनीतिक दिशा कतातर्फ मोडिन्छ भन्ने चासो बढेको छ।

वि लामिछानेले प्रहरी हिरासतमा