महिलाहरूको जीवनमा कहिलेकाहीं योनि चिलाउने समस्या देखिन सक्छ। यद्यपि, यो समस्या लामो समयसम्म रहिरहने वा बारम्बार दोहोरिरहने हो भने यसलाई सामान्य मान्न सकिंदैन। यो समस्या विभिन्न कारणले उत्पन्न हुन सक्छ, जसमध्ये प्रमुख कारणहरू योनीको राम्रो सफाई नगर्नु र असुरक्षित यौन सम्बन्धबाट सर्ने यौन रोगहरू हुन्।

योनि चिलाउने प्रमुख कारणहरू:

1. तनाव:
   सुन्दा अचम्म लाग्न सक्छ, तर तनावका कारण पनि योनि चिलाउने समस्या उत्पन्न हुन सक्छ।

2. यिस्ट संक्रमण:
   योनि क्षेत्रमा यिस्ट इन्फेक्सन हुँदा सेतो दहीजस्तो ढुसी जम्मा हुन्छ, जसले गर्दा चिलाउने समस्या हुन्छ। मधुमेहका बिरामीहरूमा यिस्ट इन्फेक्सन हुने सम्भावना बढी हुन्छ। यसबाट प्रभावित क्षेत्रमा रातो दाग देखिने र त्यस क्षेत्र सुख्खा भएर चिलाउने समस्या उत्पन्न हुन्छ।

3. सुख्खा छाला:
   छालाको आवश्यक पानीको अभावले गर्दा योनि वरपरको छाला सुख्खा भई चिलाउने समस्या हुन सक्छ।

4. यौन संक्रमण:
   धेरै जनासँग असुरक्षित यौन सम्पर्क राख्दा मात्र यौन रोग लाग्ने होइन, योनी चिलाउने समस्या पनि सुरु हुन सक्छ।

यी बाहेक, योनि संक्रमण, चोटपटक, महिनावारी बन्द हुनु आदि कारणले पनि यो समस्या देखिन सक्छ।

योनि चिलाउने समस्याको समाधानका घरेलु विधिहरू:

1. समस्या पहिचान:
   चिलाउने समस्याको मूल कारण पहिचान गर्नुहोस्। यदि असुरक्षित यौन सम्पर्कका कारण समस्या उत्पन्न भएको हो भने त्यस्तो कार्य तुरुन्तै बन्द गर्नुहोस्।

2. रसायनिक पदार्थबाट बच्ने:
   कुनै रसायनिक पदार्थ, जस्तै परफ्युमको प्रयोगले चिलाउने समस्या उत्पन्न भएमा त्यसको प्रयोग तुरुन्तै बन्द गर्नुहोस्।

3. बास्नादार सामग्री प्रयोग नगर्ने:
   बास्नादार टावेल वा बाथ टब प्रयोग गर्दा चिलाउने समस्या भएको हो भने त्यस्ता सामग्रीको प्रयोग नगर्नुहोस्।

4. सुतिको पेन्टी प्रयोग:
   सुतिको पेन्टी मात्र प्रयोग गर्नुहोस् र चिलाइ निको नभएसम्म राति सुत्दा पेन्टी नलगाउनु राम्रो हुन्छ।

5. यौन सम्पर्कबाट बच्ने:
   चिलाउने समस्या निको नभएसम्म यौन सम्पर्क नराख्नुहोस्। यदि यौन सम्पर्क राख्नै परेमा कन्डमको प्रयोग गर्नुहोस्।

6. चिल्लो पदार्थको प्रयोग:
   यदि योनि सुख्खा हुने समस्या छ भने यौन सम्पर्क राख्दा चिप्लो बनाउन चिल्लो पदार्थको प्रयोग गर्नुहोस्।

7. सफाईमा ध्यान दिने:
   सधैं यौन अंगको राम्रोसँग सफाई गर्नु आवश्यक छ।

यी घरेलु उपायहरू अपनाउँदा पनि समस्या कायम रह्यो भने चिकित्सकको परामर्श लिनु उपयुक्त हुन्छ।