महालक्ष्मी बैंकमा ठूलो काण्ड: ग्राहकलाई ज्यान मार्ने धम्की, सीईओ र प्रबन्धक पक्राउको तयारी!
केपी कन्सट्रक्सन एण्ड ईन्टरप्राईजेज प्रा.लि.ले पाएको व्यवसायिक चेक कम्पनीको खाता नभएको महालक्ष्मी विकास बैंकको बानेश्वर शाखामा जम्मा भएको विवादले बैंकिङ प्रणालीप्रति गम्भीर प्रश्न उठाएको छ। ग्लोबल आइएमई र एनआईसी एसिया बैंकमा जम्मा हुनुपर्ने चेक महालक्ष्मी विकास बैंकमा कसरी पुग्यो भन्ने विषयले विभिन्न आरोप र प्रत्यारोपलाई जन्म दिएको छ।
सञ्चालकको आरोप: 'डकैती शैलीमा चेक खोसे'
केपी कन्सट्रक्सनका सञ्चालक कर्ण प्रसाद कुशबाहाका अनुसार बैंकका शाखा प्रवन्धक विकास रावलले राति ९ बजे डिल्लीबजारस्थित उनको घरमा आएर डकैती शैलीमा चेक खोसेर लगे। कुशबाहाले भने, "मलाई चेक दिने पक्षले बैंकलाई जानकारी दिएपछि बैंक मेनेजरले चेक खोसेर फर्जी खाता खोलेर रकम ट्रान्सफर गरेका रहेछन्। जब मैले विरोध गरे, बैंकको केन्द्रीय कार्यालयमा १०–१२ जना गुण्डाले मलाई कुटपिट गरे।"
कुशबाहाले थपे, "रिकभरी डिपार्टमेन्टका मालीन रत्न शाहीले समेत मलाई हातपात गरे। शाखा प्रवन्धक रावलले ज्यान मार्ने धम्की दिए। प्रहरीको हस्तक्षेपपछि केही घण्टा बैंकका कर्मचारीलाई नियन्त्रणमा लिइए पनि केही समयमै छोडियो।"
विकास रावलको बचाउ: 'कुशबाहाले नै चेक दिएका हुन्'
महालक्ष्मी विकास बैंक बानेश्वर शाखाका प्रवन्धक विकास रावलले कुशबाहाको आरोपलाई अस्वीकार गर्दै भने, "कुशबाहाले आफैं चेक दिएका हुन्। उनी अपराधिक पृष्ठभूमिका व्यक्ति हुन् र बैंकलाई फसाउने षड्यन्त्र गरिरहेका छन्।"
रावलका अनुसार बैंकले ग्राहकको अनुरोधमा चेकलाई इन्टरनल खातामा जम्मा गरी व्यक्तिगत खातामा ट्रान्सफर गरेको हो। "कम्पनीको खाता ब्ल्याकलिस्टमा रहेकाले नयाँ खाता खोल्न नमिल्ने हुँदा यस्तो कदम चालिएको हो," रावलले थपे। तर, कम्पनीको नाममा काटिएको चेक व्यक्तिगत खातामा कसरी जम्मा भयो भन्ने प्रश्नमा उनले कानूनी टोलीसित बुझ्न आग्रह गरे।
बैंकको मिलेमतोको आरोप
कम्पनी सञ्चालक कुशबाहाले बैंकका सीईओ दिपेश लम्सालको संलग्नतामा फर्जी कागजात प्रयोग गरी कम्पनीको नाममा खाता खोलेर चेक जम्मा गरी रकम निकालिएको आरोप लगाएका छन्। उनले यस घटनाको छानबिनको माग गर्दै केन्द्रीय अनुसन्धान ब्यूरो (सीआईबी)मा उजुरी दिएका छन्।
बैंकिङ प्रणालीमाथि प्रश्नचिन्ह
यो घटनाले बैंकिङ प्रणालीको विश्वसनीयतामाथि गम्भीर प्रश्न उठाएको छ। खाता नभएको बैंकमा नक्कली कागजात प्रयोग गरी खाता खोल्नु र चेक जम्मा गर्नु आपराधिक गतिविधि भएको विश्लेषकहरूको भनाइ छ। "यदि बैंकमै यस्तो आपराधिक कामले प्रश्रय पायो भने सर्वसाधारणको बचत संकटमा पर्नेछ," एक विश्लेषकले भने।
प्रहरी र नियामक निकायको प्रतिक्रिया
सीआईबी र नेपाल राष्ट्र बैंकले यस घटनालाई गम्भीरतापूर्वक लिएको छ। प्रहरी स्रोतका अनुसार सीईओ र शाखा प्रवन्धकलाई अनुसन्धानका लागि सीआईबीमा बोलाइएको छ। "यदि आइतबारसम्म नआए उनीहरूलाई पक्राउ गरिनेछ," स्रोतले भन्यो। राष्ट्र बैंकले पनि बैंकिङ प्रणालीको दुरुपयोगबारे अध्ययन सुरु गरेको छ।
बैंकका सीईओ अझै सम्पर्कबिहीन
घटनाको बारेमा बैंकका प्रमुख कार्यकारी अधिकृत दिपेश लम्सालसँग सम्पर्क गर्ने प्रयास गर्दा पनि उनी उपलब्ध भएनन्। यदि उनले जवाफ दिए, त्यसलाई अर्को समाचारमार्फत प्रकाशन गरिनेछ।
सार्वजनिक विश्वसनीयतामा संकट
यो घटना बैंकिङ प्रणालीको नैतिकता र पारदर्शितामा धक्का पुर्याउने घटनाको रूपमा हेरिएको छ। यदि नियमनकारी निकायले दोषीमाथि कठोर कारबाही गरेन भने बैंकप्रति आम मानिसको विश्वास गुम्ने जोखिम देखिन्छ।
