कैलालीको धनगढी उपमहानगरपालिका–१३ राजपुरमा गएराति भएको सडक दुर्घटनामा एक युवकको ज्यान गएको छ भने अर्का एक घाइते भएका छन्।

सुदूरपश्चिम प्रदेश ट्राफिक प्रहरी कार्यालयका प्रवक्ता प्रहरी नायब उपरीक्षक टेकबहादुर जोराले दिएको जानकारीअनुसार अत्तरियातर्फ गइरहेको सु.प्र.०१०११ प ४४७३ नम्बरको स्कुटर आरपी फ्लोर मिल नजिकै सडकको ‘डिभाइडर’ मा ठोक्किँदा दुर्घटना भएको हो।

दुर्घटनामा स्कुटर चालक बैतडीको पुर्चौडी नगरपालिका–८ का २४ वर्षीय प्रान्जल बम गम्भीर घाइते भएका थिए। उनलाई उपचारका लागि तत्काल माया मेट्रो अस्पताल लगिएको भए पनि चिकित्सकले मृत घोषणा गरेका थिए।

उक्त स्कुटरमा सवार पुर्चौडीकै २६ वर्षीय सरोज बम घाइते भएका छन्। उनको उपचार माया मेट्रो अस्पतालमै भइरहेको प्रहरीले जनाएको छ।

नेपालमा प्रत्येक वर्ष सडक दुर्घटनाका कारण सयौँले ज्यान गुमाइरहेका तथ्यांकहरू छन्। सडकमा बढ्दो भीडभाड, गति नियन्त्रण र सुरक्षाप्रति लापरबाहीजस्ता कारणले स्थानीय स्तरदेखि राष्ट्रिय नीतिसम्म थप सचेत र प्रभावकारी कदम आवश्यक देखिएको छ।