सुनसरी – नेपाल समाजवादी पार्टी (नयाँ शक्ति) का अध्यक्ष डा. बाबुराम भट्टराईले पुराना राजनीतिक संरचनाले मात्र समाधान नदिने भन्दै नयाँ वैकल्पिक शक्ति निर्माण गर्न सबै पक्ष एकजुट हुनुपर्ने बताएका छन्।

सुनसरीमा आयोजित ‘राजनीतिक तथा वैचारिक अभिमुखीकरण’ कार्यक्रममा बोल्दै उनले आलोचना गरेर चुप लाग्नुको सट्टा सक्रिय रूपमा नयाँ शक्ति निर्माणमा लाग्न आग्रह गरे। ‘बाबुरामले सकेनन्’ भन्दै टुलुटुलु हेरेर केही हुँदैन। मिलेर अघि बढौं, वैकल्पिक शक्ति निर्माण गरौं,’ उनले भने।

भट्टराईका अनुसार उनको पार्टी कुनै एक वर्ग, जाति वा समुदायको मात्र होइन, सबै नेपालीको साझा शक्ति हो। ‘हाम्रो दस्तावेज जस्तो कुनै पार्टीसँग छैन। अरू दलहरू सीमित वर्ग वा समुदायका प्रतिनिधि मात्रै देखिन्छन्, तर हाम्रो पार्टी समावेशी, न्याययुक्त, वैज्ञानिक सोचबाट निर्देशित साझा फूलबारी हो,’ उनले दाबी गरे।

उनले पुराना दलहरू लोकतान्त्रिक देखिए पनि बुर्जुवा सोचले ग्रस्त रहेको आरोप लगाए। ‘परम्परागत दलहरूले परिवर्तनका कुरा गरे पनि तिनको संरचना पुरानै छ। चौथो औद्योगिक क्रान्तिको युगमा पुराना शैलीले मात्र देशलाई अघि बढाउन सक्दैन। अब समावेशी, वैज्ञानिक र वास्तविक लोकतान्त्रिक पार्टीको आवश्यकता छ,’ उनले स्पष्ट पारे।

आफूले पुरानो शक्ति त्यागेर नयाँ बाटो रोजेको उल्लेख गर्दै उनले "परिवर्तन बाहिरबाट होइन, भित्रबाट गर्नुपर्छ" भन्ने धारणा व्यक्त गरे। आलोचना गरेर मात्रै परिवर्तन सम्भव नहुने भन्दै उनले नयाँ राजनीतिक शक्तिको निर्माणमा हातेमालो गर्न सबैलाई आह्वान गरे। ‘टाढाबाट हेरिरहनुहोस्, आलोचना मात्र गरिरहनुहोस्-यसले केही परिवर्तन ल्याउँदैन। अब हातमा हात जोडेर, मिलेर अघि बढ्नुपर्छ,’ उनले जोड दिए।