भुटानको थिम्पुमा जारी एएफसी यु–२० एसियन कप छनोटको समूह ‘ए’ अन्तर्गतको अन्तिम खेलमा नेपाल उत्तर कोरियासँग ११–० गोलले पराजित भएको छ ।

यससँगै नेपालको २०२६ मा थाइल्यान्डमा हुने मुख्य प्रतियोगितामा पुग्ने सम्भावना समाप्त भएको हो। जित्नै पर्ने निर्णायक खेलमा नेपाल प्रारम्भदेखि नै दबाबमा रह्यो। उत्तर कोरियाले पहिलो हाफमै ५ गोल गर्दै खेलको दिशालाई एकतर्फी बनायो भने दोस्रो हाफमा थप ६ गोल गर्दै जित सुनिश्चित गर्‍यो।

यो जितसँगै उत्तर कोरियाले तीनै खेल जित्दै ९ अङ्क बटुलेको छ र समूह विजेताको हैसियतमा एसियन कपको ढोका खोलेको छ। यसअघि उसले साउदी अरेबियालाई १५–० र भुटानलाई १०–० गोल अन्तरले हराएको थियो। नेपालले भने ३ खेलमा ४ अङ्क मात्र जोड्यो— पहिलो खेलमा भुटानसँग १–१ बराबरी, दोस्रो खेलमा साउदी अरेबियाविरुद्ध १–० को जित, र अन्तिम खेलमा उत्तर कोरियासँग भारी हार। सिङ्गल राउन्ड रोविन लिग पद्धतिमा शीर्ष टोली मात्र छनोट हुने नियमअनुसार नेपाल बाहिरिएको हो।