काठमाडौं — नेपालमा पहिलोपटक अन्तर्राष्ट्रिय ख्यातिप्राप्त मोटिभेसनल लेखक तथा व्यवसायिक प्रशिक्षक डा. उज्ज्वल पाटनीको विशेष उपस्थितिमा “बिजनेस ब्लुप्रिन्ट नेपाल” आयोजना हुने भएको छ। कार्यक्रम २०८२ साल भदौ १२ गते (२०२५ अगस्ट २८), बिहीबार, काठमाडौंको नक्सालस्थित होटल मेरियटमा बिहान १०:३० बजेदेखि अपरान्ह ५ बजेसम्म सञ्चालन हुनेछ।

आयोजकहरूका अनुसार, मेगा व्यवसायिक सेमिनारको मुख्य प्रायोजकका रूपमा नेपालको अग्रणी सिमेन्ट ब्रान्ड शिवम् सिमेन्ट आवद्ध भएको छ। कम्पनीले यसलाई व्यवसायिक उत्प्रेरणा र ज्ञान आदानप्रदान गर्ने अवसरका रूपमा लिएको जनाएको छ। शिवम् सिमेन्टका प्रतिनिधिले भने, “डा. पाटनी जस्तो विश्वस्तरका स्पिकरसँगको सहकार्यले सहभागीहरूलाई अन्तर्राष्ट्रियस्तरको व्यवसायिक दृष्टिकोण र प्रेरणा प्रदान गर्नेछ।”

डा. पाटनीसँग तीन गिनिज वर्ल्ड रेकर्ड, १५ भन्दा बढी राष्ट्रिय तथा अन्तर्राष्ट्रिय पुरस्कार, Top 10 Thinker 2014 र Best Corporate Trainer of India जस्ता सम्मानहरू छन्। उहाँको साप्ताहिक डिजिटल शो The Ujjwal Patni Show ७५ भन्दा बढी देशमा ८० लाखभन्दा बढी दर्शकद्वारा हेर्ने गरिएको बताइन्छ। साथै, Business Gurukul, VIP र Business Audit कार्यक्रममार्फत १० हजारभन्दा बढी व्यवसायीहरूले प्रत्यक्ष लाभ पाएको आयोजकको दाबी छ। उनका सात पुस्तक १२ भारतीय भाषामा अनुवाद भइसकेका छन् र विश्वभर २८ देशमा १० लाखभन्दा बढी प्रतिहरू बिक्री भएको तथ्यांक प्रस्तुत गरिएको छ।

शिवम् सिमेन्टले विगतमा विज्ञापन मात्र नभई “शिवम् सन्देश” र “नो कम्प्रमाइज” जस्ता अभियानमार्फत सामाजिक सन्देश प्रवाह गर्दै आएको छ। कम्पनीले यसअघि पनि विभिन्न राष्ट्रिय तथा अन्तर्राष्ट्रिय कार्यक्रमहरूमा सहभागिता जनाउँदै आफ्नो ब्रान्ड मूल्य सुदृढ गर्ने प्रयास गर्दै आएको बताएको छ। यसपटकको सहकार्यलाई कम्पनीले आफ्नो ब्रान्डको सामाजिक र व्यवसायिक संलग्नताको निरन्तरता भनेको छ।

यस कार्यक्रमले नेपालका व्यवसायी र उद्यमशील युवालाई अन्तर्राष्ट्रिय अनुभवसहितको ज्ञान र प्रेरणा प्राप्त गर्ने अवसर दिने अपेक्षा आयोजकले व्यक्त गरेका छन्।