वर्षायामसँगै आर्द्रता र पानीजन्य क्षतिका कारण मोबाइल फोनमा समस्या बढ्ने सम्भावनालाई ध्यानमा राख्दै स्यामसङ नेपालले ‘स्यामसङ मानसुन क्याम्प’ सञ्चालनमा ल्याएको छ। अभियानअन्तर्गत प्रयोगकर्ताको स्मार्टफोनको चार्जिङ पोर्टमा क्षति भए निःशुल्क प्रतिस्थापन सेवा उपलब्ध गराइनेछ।

यो सेवा साउन २७ देखि भदौ ७ (अगस्ट २४, २०२५) सम्म सिमित अवधिका लागि मात्र उपलब्ध हुनेछ। वारेन्टीको अवधि समाप्त भएको वा जारी सबै स्यामसङ प्रयोगकर्ताले सेवा लिन सक्ने व्यवस्था गरिएको छ। चार्जिङ पोर्ट प्रतिस्थापन निःशुल्क भए पनि अन्य आवश्यक पार्टपुर्जा र श्रम शुल्क भने प्रयोगकर्ताले व्यहोर्नु पर्ने कम्पनीले जनाएको छ।

स्यामसङका अनुसार सेवा केवल अधिकृत सेवा केन्द्रमार्फत प्रदान गरिनेछ। यसले अनधिकृत मर्मतबाट हुने जोखिम घटाउने र ग्राहकलाई दीर्घकालीन समाधान दिने लक्ष्य राखेको छ।

“स्यामसङ नेपालमा हामी हरेक मौसममा ग्राहकलाई निश्चिन्त अनुभव दिलाउन प्रतिबद्ध छौं। मानसुनले ल्याउने आर्द्रता र पानीजन्य जोखिम विशेषगरी चार्जिङ पोर्टमा प्रभाव पार्छ। यस अभियानमार्फत हामी प्रयोगकर्तालाई सावधानीपूर्वक मर्मत सुविधा प्रदान गर्दै वर्षायाममा सुरक्षित रूपमा सम्पर्कमा रहन मद्दत गर्नेछौं,” स्यामसङ नेपालका डिप्टी जनरल म्यानेजर तथा सिएस प्रमुख राजन भट्टराईले बताएका छन्।

कम्पनीले प्रयोगकर्तालाई यो अवसरको लाभ लिन आग्रह गर्दै नजिकैको अधिकृत सेवा केन्द्रमा सम्पर्क गर्न आह्वान गरेको छ।