नेपाली राष्ट्रिय फुटबल टोलीका कप्तान तथा मुख्य गोलरक्षक किरण चेम्जोङ बङ्गलादेशको शीर्षस्तरीय फुटबल लिग खेल्ने भएका छन्। बङ्गलादेश पुलिस क्लबले ३५ वर्षीय किरणलाई आधिकारिक रूपमा अनुबन्ध गरेको हो।

यो अनुबन्धसँगै किरणको व्यावसायिक करियरमा बङ्गलादेश चौथो विदेशी गन्तव्य बनेको छ। यसअघि उनले माल्दिभ्सको ट्रस्ट एन्ड केयर स्पोर्ट्स र माजिया स्पोर्ट्स क्लब, तथा भारतको मिनर्भा पञ्जाव एफसीबाट लिग खेलिसकेका छन्।

बङ्गलादेश पुलिस क्लबमा किरण अनुबन्धित हुने दोस्रो नेपाली खेलाडी हुन्। यसअघि राष्ट्रिय टोलीका अर्का अग्रपंक्तिका खेलाडी आयुष घलानलाई क्लबले अनुबन्ध गरिसकेको छ।

किरण आगामी सिजनको तयारीका लागि मङ्गलबार बङ्गलादेश पुगेका छन्। क्लब र खेलाडीबीचको आर्थिक तथा अवधि सम्बन्धी विवरण भने सार्वजनिक गरिएको छैन। बङ्गलादेश प्रिमियर लिगको नयाँ सिजन आगामी महिना सुरु हुने अपेक्षा गरिएको छ, जसमा किरणले आफ्नो अन्तर्राष्ट्रिय अनुभवको फाइदा क्लबलाई दिलाउने विश्वास गरिएको छ।